દુબઇ થી સોનાની દાણચોરી (gold smuggling) કરવાના રેકેટનો અમદાવાદ ક્રાઇમ બ્રાન્ચ (Ahmedabad Crime Branch) દ્વારા પર્દાફાશ થયો છે. અમદાવાદ ક્રાઇમ બ્રાન્ચે સોનાની દાણચોરી કરતા આરોપી અને સોની સહિત 2 શખ્સને ઝડપી પાડ્યા છે. પોલીસે તેમની પાસેથી 45 લાખ રોકડા તથા સોનાના પતરા અને દિરહામ તેમજ આઇફોન મળીને 80,08,120 રુપિયાનો મુદ્દામાલ કબજે કર્યો છે.
સોનાના અંડરવેર પહેરીને યુગલ દુબઈ થી અમદાવાદ પહોચ્યું
9 જુલાઇના રોજ અમદાવાદ ક્રાઇમ બ્રાન્ચ દ્વારા માણેકચોક સાંકડી શેરી નાનશા જીવણની પોળના નાકેથી સોનાની દાણચોરી કરવાના કેસમાં જીગ્નેશ ઉર્ફે જીગર ભીખાભાઇ રાઠોડ (રહે, સમોર હાઇટ્સ, નરોડા) અને કેતન હર્ષદ સોની (રહે, નાનશા જીવણની પોળ સાંકડી શેરી)ની ધરપકડ કરી હતી. આ બંને આરોપીઓ પાસેથી પોલીસને 45 લાખ રુપિયા તથા સોનાના 3 પતરા તથા 4 દિરહામની નોટ મળીને 80 લાખથી વધુ રુપિયાનો મુદ્દામાલ કબજે કર્યો હતો. પોલીસ દ્વારા જીગ્નેશ ઉર્ફે જીગરની પૂછપરછ કરતાં દાણચોરીના કૌભાંડનો પર્દાફાશ થયો હતો. જીગરની પૂછપરછમાં પોલીસને જાણવા મળ્યું છે કે અમદાવાદના જયેશ સોની નામના વ્યક્તિએ તેને અને તેની પત્ની શીલાને દુબઇ ખાતે સોનુ લાવવા માટે મોકલ્યા હતા. પતિ પત્ની બંનેને દુબઇ જવા આવવાની એર ટિકીટ તથા ચાર દિવસ રહેવાનો ખાવા પીવાનો હોટેલનો ખર્ચો અને ટ્રીપ દરમિયાન 25 હજાર રૂપિયા આપવાનું નક્કી થયું હતું.
પતિ-પત્નીને દુબઈના હોટેલમાં સોનાના કપડા પહેરવા આપ્યા
આ પતિ પત્ની દુબઇ પહોંચ્યા બાદ દુબઇમાં નીલ હોટલમાં રોકાયા હતા. તે વખતે જયેશ સોનીના કહેવા પ્રમાણે તેનો ચેતન ચૌધરી નામનો શખ્સ હોટલ પર મળવા આવ્યો હતો અને અને પહેરવા માટે બંનેને એક એક વજનદાર જાંગીયા આપ્યા હતા. આ શખ્સે શીલા માટે વજનદાર સેનેટરી પેડ પણ આપ્યું હતું અને આ કપડાંમાં કેમિકલ મિશ્રિત સોનુ ભેળવેલું હોવાનું જણાવ્યું હતું. આ કપડાં પહેરીને જીગર અને શીલા ગઈ 19 જૂનના રોજ દુબઇથી મુંબઇ આવ્યા હતા.મુંબઇ ઇન્ટરનેશનલ એરપોર્ટ પર પતિ-પત્ની ઉતર્યા હતા અને ઇમિગ્રેશન તથા કસ્ટમમાંથી માણ માણ બહાર આવી મુંબઈના બોરીવલી સ્ટેશનથી ટ્રેનમાં બેસીને તરત સુરત આવ્યા હતા અને સુરતથી વોલ્વોનો સહારો લઈને અમદાવાદ આવ્યા હતા. જો કે ત્યારબાદ પતિ પત્નીએ જયેશ સોનીને દુબઇથી લાવેલુ સોનુ લૂંટાઇ ગયું હોવાનું જણાવ્યું હતું.
સોનાના કપડાં પેહરીને પતિ પત્ની ગેરકાયદે દુબઈથી અમદાવાદ પહોંચી ગયા https://t.co/5yPAcT658K#news #newsinside #GoldMafia #Smugglers #ahmedabad #gujarat #india @GujaratPolice pic.twitter.com/NFz4DgG5gM
— NEWS INSIDE (@NEWSINSIDEMEDIA) July 14, 2023
ગેરકાયદે આવેલ સોનાની પણ પતિ પત્નીએ ગફલત કરી નાખી
ત્યારબાદ જીગ્નેશ ઉર્ફે જીગરે સોનુ તેના મિત્ર કેતન સોનીને આપ્યું હતું અને કપડામાંથી સોનું અલગ કરી કેટલુંક સોનુ વેચી દીધું હતું અને તે સોનાના 45 લાખ આપ્યા હતા. કેતન પાસેથી બાકી રહેલું 546 ગ્રામ 22 મિલીગ્રામ સોનુ મળી આવ્યું હતું. પોલીસે આ તમામ મુદ્દામલ કબજે કર્યું હતું અને સોનાની તસ્કરી બાબતે તપાસ કરવા કસ્ટમ વિભાગને જાણ કરી હતી.
દાણચોરીના રેકેટની તપાસ હાલ શરુ
બંને આરોપીઓ આ સોનું ક્યા સ્વરુપે લાવ્યા હતા અને કેતન સોનીએ કઇ રીતે કપડામાંથી સોનુ અલગ કર્યું હતું તેમજ 45 લાખનું સોનું કોને કોને વેચ્યું છે તદઉપરાંત દુબઇથી સોનુ મંગાવનાર જયેશ સોની ક્યાં રહે છે અને તે કોણ છે તે સહિતના મુદ્દા પર પોલીસ દ્વારા તપાસ શરુ કરી દેવામાં આવી છે. જીગ્નેશ અને તેની પત્ની અગાઉ જયેશના અથવા બીજા શખ્સોના કહેવાથી આ રીતે સોનુ લાવ્યા છે કે કેમ અને સોનાની દાણચોરીનું ચોક્કસ રેકેટ ચાલે છે કે કેમ અને ચાલે છે તો તેમાં કોણ કોણ સંડોવાયેલું છે તેની પણ ક્રાઇમ બ્રાન્ચે તપાસ શરુ કરી છે.
