અમદાવાદ: શહેર પોલીસ કમિશનરશ્રીના માર્ગદર્શન હેઠળ, લોકલ ક્રાઇમ બ્રાન્ચ (LCB) ઝોન 2 ની ટીમે ગંભીર ગુનાઓમાં લાંબા સમયથી નાસતા ફરતા આરોપીઓને પકડવાની ઝુંબેશમાં નોંધપાત્ર સફળતા મેળવી છે. ટીમે બે અલગ-અલગ હત્યાના કેસમાં અનુક્રમે ૧૫ અને ૨૨ વર્ષથી ફરાર મુખ્ય આરોપીઓને હરિયાણા અને દિલ્હી જેવા રાજ્યોમાંથી અત્યંત કુનેહપૂર્વક ઝડપી પાડ્યા છે.
કેસ ૧: ૧૫ વર્ષે પકડાયો ૨૦૦૯ના ડબલ મર્ડરનો આરોપી
વર્ષ ૨૦૦૯માં શહેરના સાબરમતી પોલીસ સ્ટેશન વિસ્તારમાં પ્રબોધ રાવલ બ્રિજ પાસે થયેલા ચકચારી ડબલ મર્ડર કેસનો મુખ્ય આરોપી દિનેશ સોવરણ ઉર્ફે શુન્નાહ કુશવાહ (ઉં.વ. ૪૬, મૂળ રહે. રાજસ્થાન) છેલ્લા ૧૫ વર્ષથી પોલીસને ચકમો આપી રહ્યો હતો. તારીખ ૨૨ નવેમ્બર ૨૦૦૯ના રોજ, ચણા જોર ગરમના ધંધા બાબતે થયેલી સામાન્ય તકરારમાં આરોપીએ જાહેરમાં ફાયરિંગ કરી બે વ્યક્તિઓની નિર્મમ હત્યા કરી હતી. આ ઘટના બાદ તે ફરાર થઈ ગયો હતો.
LCB ઝોન 2 ના પોલીસ સબ ઇન્સ્પેક્ટર કે.ડી. પટેલ અને તેમની ટીમને હ્યુમન તથા ટેક્નિકલ સોર્સિસ દ્વારા બાતમી મળી કે દિનેશ કુશવાહ હરિયાણાના કુરુક્ષેત્ર જિલ્લાના શાહાબાદ ખાતે વેશપલટો કરીને નર્સરીનો ધંધો ચલાવી રહ્યો છે. આ બાતમીના આધારે, ટીમે હરિયાણા પહોંચી સતત બે દિવસ સુધી વેશપલટો કર્યો. ટીમના સભ્યો ફૂલ-છોડના ગ્રાહકો બની અનેક નર્સરીઓમાં ફર્યા અને આખરે આરોપી દિનેશની નર્સરી શોધી કાઢી. ગ્રાહક તરીકે વાતચીત કરી, વિશ્વાસ કેળવી તેની ઓળખની પુષ્ટિ કર્યા બાદ તેને દબોચી લેવામાં આવ્યો.
કેસ ૨: ૨૨ વર્ષ જૂના હત્યા કેસનો ભેદ ઉકેલાયો, આરોપી દિલ્હીથી ઝડપાયો
બીજા એક કિસ્સામાં, LCB ઝોન 2 એ ૨૨ વર્ષ જૂના હત્યાના વણઉકેલ્યા ગુનાનો ભેદ ઉકેલી કાઢ્યો છે. તારીખ ૪ ફેબ્રુઆરી ૨૦૦૩ના રોજ સાબરમતીના ચેનપુર-ગોતા રોડ પર પ્રકાશ નટુભાઈ જમોડ નામના યુવકની તીક્ષ્ણ હથિયારના ઘા મારેલી હાલતમાં લાશ મળી આવી હતી. તપાસમાં ખુલ્યું હતું કે, આરોપી અનિલ રમેશચંદ્ર સોની (ઉં.વ. ૪૬, મૂળ રહે. મધ્યપ્રદેશ) એ પ્રેમ પ્રકરણની અદાવતમાં તેના સાથી સુરેશ રાઠોડ સાથે મળી પ્રકાશની હત્યા કરી હતી અને ઘટના બાદ વતન ભાગી ગયો હતો. અનિલની રાધા નામની યુવતી સાથે સગાઈની વાત ચાલતી હતી, પરંતુ રાધાને પ્રકાશ સાથે પ્રેમસંબંધ બંધાતા તેણે અનિલ સાથે લગ્નની ના પાડી હતી, જેનો બદલો લેવા અનિલે આ કૃત્ય આચર્યું હતું.
છેલ્લા ૨૨ વર્ષથી ફરાર અનિલ સોની પોલીસ પકડથી દૂર હતો. LCB ઝોન 2 ની ટીમને બાતમી મળી કે તે દિલ્હીના શાહદરા, અશોક નગર વિસ્તારમાં છુપાયો છે અને બાંધકામના ઠેકેદાર તરીકે કામ કરે છે. PSI કે.ડી. પટેલ અને તેમની ટીમે દિલ્હી પહોંચી, સતત બે દિવસ સુધી વેશપલટો કર્યો – ક્યારેક આઈસ્ક્રીમ/ફળના ફેરિયા બની તો ક્યારેક કડિયાકામના કારીગર બની આરોપી અંગે માહિતી એકત્ર કરી. ચોક્કસ બાતમીના આધારે ટીમે આરોપી અનિલ સોનીને બાંધકામ સાઇટ પરથી ઝડપી પાડ્યો. વધુમાં, એ પણ જાણવા મળ્યું છે કે અનિલ સોની વિરુદ્ધ ૨૦૧૫માં મધ્યપ્રદેશમાં પણ એક હત્યાનો ગુનો નોંધાયેલો છે.
આગળની કાર્યવાહી
બંને સફળ ઓપરેશનમાં LCB ઝોન 2 ની ટીમે વેશપલટો કરી અત્યંત સાવચેતીપૂર્વક આરોપીઓ સુધી પહોંચવામાં સફળતા મેળવી છે. પકડાયેલા બંને આરોપીઓ, દિનેશ કુશવાહ અને અનિલ સોની, વિરુદ્ધ કાયદેસરની કાર્યવાહી હાથ ધરી, તેમને વધુ તપાસ અર્થે સાબરમતી પોલીસ સ્ટેશનને સોંપવાની તજવીજ હાથ ધરવામાં આવી છે. LCB ઝોન 2 ની ટીમે વર્ષો જૂના વણઉકેલ્યા કેસો ઉકેલીને પ્રશંસનીય કામગીરી કરી છે.
