અમદાવાદ: શહેર ક્રાઈમ બ્રાન્ચે સ્પર્મ વ્હેલની ઉલટીમાંથી બનતું અત્યંત મૂલ્યવાન દ્રવ્ય એમ્બરગ્રીસનો મોટો જથ્થો જપ્ત કર્યો છે અને આ સંબંધમાં ચાર વ્યક્તિઓની ધરપકડ કરી છે. જપ્ત કરાયેલા એમ્બરગ્રીસની કિંમત રૂ. ૨.૯૦ કરોડથી વધુ હોવાનું જાણવા મળ્યું છે.
અહીં આ પ્રકારની સ્પર્મ વ્હેલની વાત થઈ રહી છે.
ક્રાઈમ બ્રાન્ચના સૂત્રોના જણાવ્યા અનુસાર, આ સમગ્ર ઓપરેશનની શરૂઆત ત્યારે થઈ જ્યારે બાતમી મળી કે આમીર મનસુરી નામનો એક શખ્સ એમ્બરગ્રીસ વેચવા માટે સુરતથી અમદાવાદ આવ્યો છે. પોલીસે તેને પકડીને પૂછપરછ કરતાં તેણે ગુનાની કબૂલાત કરી હતી. આરોપી મનસુરીએ જણાવ્યું હતું કે આ જથ્થો તેને સુરતના ઉસમાન શેખે આપ્યો હતો.
આ માહિતીના આધારે, ક્રાઈમ બ્રાન્ચની એક ટીમે સુરત જઈને ઉસમાન શેખના ઘરે દરોડો પાડ્યો હતો. દરોડા દરમિયાન, પોલીસને ૨.૯૦૪ કિલોગ્રામ એમ્બરગ્રીસ મળી આવ્યું, જેની આંતરરાષ્ટ્રીય બજારમાં કિંમત આશરે રૂ. ૨,૯૦,૪૦,૦૦૦ હોવાનો અંદાજ છે. પોલીસે આ જથ્થો જપ્ત કરીને ઉસમાન શેખની ધરપકડ કરી હતી.
વધુ તપાસમાં, પોલીસને આ ગુનામાં સંડોવાયેલા અન્ય બે આરોપીઓ વિશે માહિતી મળી હતી, જેમની પણ ધરપકડ કરવામાં આવી છે. પકડાયેલા આરોપીઓની ઓળખ ઉસમાન શેખ (ઉંમર ૨૬), સહાદતઅલી ઉર્ફે બાબુ (ઉંમર ૨૯), મોહમ્મદ હનીફ (ઉંમર ૨૧) અને આમીર મનસુરી (ઉંમર ૨૫) તરીકે થઈ છે.
પોલીસે આરોપીઓ પાસેથી એમ્બરગ્રીસ ઉપરાંત બે મોબાઈલ ફોન પણ જપ્ત કર્યા છે, જેની કુલ કિંમત રૂ. ૨,૯૧,૧૫,૦૦૦ થાય છે. ક્રાઈમ બ્રાન્ચ આ સમગ્ર મામલે વધુ તપાસ ચલાવી રહી છે અને એમ્બરગ્રીસની દાણચોરીના નેટવર્કને ઉજાગર કરવાના પ્રયાસો કરી રહી છે.
