વિજાપુર: વિજાપુર તાલુકાના જુની આઈઆઈટી નજીક એક ખાનગી ગોડાઉનમાં સરકારી પુરવઠાનો અનાજનો મોટો જથ્થો ગેરકાયદેસર રીતે મળી આવતા ખળભળાટ મચી ગયો છે. ન્યૂઝ ઇનસાઇડની ટીમે આ અંગે માહિતી આપતા વિજાપુર મામલતદારને તાત્કાલિક જાણ કરવામાં આવી હતી, જેના પગલે ત્વરિત કાર્યવાહી હાથ ધરવામાં આવી.
મામલતદારની ટીમે તાત્કાલિક ઘટનાસ્થળે પહોંચીને ગોડાઉનને સીલ કરી દીધું છે અને અંદર સંગ્રહિત તમામ અનાજનો મુદ્દામાલ જપ્ત કરી લેવામાં આવ્યો છે. પ્રાથમિક તપાસમાં આ જથ્થો ગરીબ અને જરૂરિયાતમંદ લોકો માટેના સરકારી પુરવઠાનો હોવાનું સામે આવ્યું છે, જેનો કોઈ પણ પ્રકારની પરવાનગી વગર ખાનગી ગોડાઉનમાં સંગ્રહ કરવામાં આવ્યો હતો.
આ ઘટનામાં શોહિલભાઈ રાણાવડિયા નામના વ્યક્તિની સંડોવણી હોવાનું પ્રાથમિક તારણમાં જણાયું છે, જો કે તેમની ધરપકડ હજુ સુધી કરવામાં આવી નથી. વહીવટી તંત્ર દ્વારા આ સમગ્ર પ્રકરણની ગંભીરતાને ધ્યાનમાં લઈને તાત્કાલિક ઉચ્ચ સ્તરીય તપાસના આદેશ આપવામાં આવ્યા છે.
સૂત્રોના જણાવ્યા અનુસાર, આ અનાજનો ઉપયોગ કાળાબજારી કે અન્ય ગેરકાયદેસર પ્રવૃત્તિઓ માટે થવાની સંભાવના છે. મામલતદાર કચેરી દ્વારા જપ્ત કરાયેલા અનાજના જથ્થાની ગણતરી અને ગુણવત્તાની ચકાસણી કરવામાં આવી રહી છે.
આ ઘટનાને પગલે સ્થાનિક લોકોમાં ભારે રોષ જોવા મળી રહ્યો છે અને તેઓ આ કૃત્યમાં સંડોવાયેલા તમામ લોકો સામે કડક કાર્યવાહી કરવાની માંગ કરી રહ્યા છે. તપાસ પૂર્ણ થયા બાદ આ મામલે વધુ ખુલાસા થવાની શક્યતા છે.
