અમદાવાદ, 23 જૂન, 2025: અમદાવાદ સાયબર ક્રાઈમ બ્રાન્ચે વિવિધ રાજ્યોમાં શાળાઓ, હોસ્પિટલો અને સ્ટેડિયમોને બોમ્બથી ઉડાવી દેવાની ધમકી આપનાર એક આરોપીની ચેન્નઈથી ધરપકડ કરીને મોટી સફળતા મેળવી છે. આરોપીની ઓળખ રેની જોશીલડા ડો/ઓ ગોલ્ડવીન જોસેફ એન્ટોની જ્ઞાનપ્રકાશમ તરીકે થઈ છે, જે ચેન્નઈમાં આવેલી ડેલોઈટ યુએસએઆઈ કંપનીમાં સિનિયર કન્સલ્ટન્ટ તરીકે કાર્યરત છે અને ઇલેક્ટ્રિક એન્જિનિયરિંગનો અભ્યાસ ધરાવે છે.
તાજેતરમાં, અમદાવાદ શહેરના જુદા જુદા વિસ્તારોમાં બોમ્બ બ્લાસ્ટની ધમકી આપતા ઇમેઇલ્સ મળ્યા હતા. આ ગુનાઓની તપાસ માટે સંયુક્ત પોલીસ કમિશનર શરદ સિંઘલ, નાયબ પોલીસ કમિશનર ડો. લવીના સિંહા અને મદદનીશ પોલીસ કમિશનર હાર્દિક માકડિયા દ્વારા આદેશ જારી કરવામાં આવ્યો હતો. સરખેજ પોલીસ સ્ટેશનમાં ધી ભારતીય ન્યાય સંહિતા-351(4), 351(3), 353(1) (બી) મુજબ ગુનો નોંધવામાં આવ્યો હતો. ફરિયાદી વિષ્ણુભાઈ ચમનભાઈ ખાખડીયાની ફરિયાદના આધારે, 3 જૂન, 2025 ના રોજ સવારે 10:58 વાગ્યે, તેમની જીનીવા લિબરલ સ્કૂલના ઇ-મેઇલ આઈડી પર divijprabhakara0@gmail.com પરથી ધમકીભર્યો ઇમેઇલ મળ્યો હતો. આ ઇમેઇલમાં જણાવાયું હતું કે, “પોલીસ ઊંઘી રહી છે તેઓ કંઈ કરી શકતા નથી તેઓને યોગ્ય રીતે તપાસ કરતા નથી આવડતું. જો બાળકો મરશે તો જ પોલીસ સક્રિય થશે. હૈદરાબાદની લેમન ટ્રી હોટલમાં યુવતી પર બળાત્કાર કરનાર આરોપીઓ પર પોલીસનું ધ્યાન આકર્ષિત કરવા માટે અમે તમારી શાળામાં બોમ્બ ધડાકો કરવા જઈ રહ્યા છીએ”.
માનવ સંસાધન અને ટેકનિકલ ડેટાના વિશ્લેષણના આધારે, આરોપીની ચોક્કસ માહિતી મળી હતી, જેના પગલે રેની જોશીલડાની ધરપકડ કરવામાં આવી હતી. પોલીસ તપાસમાં ખુલાસો થયો છે કે આરોપીએ તેના મિત્રને બદનામ કરવા માટે પોતાની સાચી ઓળખ છુપાવીને નકલી ઇમેઇલ આઈડી બનાવ્યા હતા. તેણે અલગ અલગ VPN, વર્ચ્યુઅલ નંબર અને ડાર્કવેબનો ઉપયોગ કરીને વિવિધ સ્થળોએ ધમકીભર્યા ઇમેઇલ્સ મોકલ્યા હતા.
રેની જોશીલડા દ્વારા છેલ્લા એક વર્ષથી બનાવટી સોશિયલ મીડિયા એકાઉન્ટ્સ અને નકલી ઇમેઇલ આઈડીનો ઉપયોગ કરીને ગુજરાતના અમદાવાદમાં આવેલી જીનીવા લિબરલ સ્કૂલ સરખેજ, નરેન્દ્ર મોદી સ્ટેડિયમ મોટેરા ચાંદખેડા, દિવ્યજ્યોત સ્કૂલ બોપલ અમદાવાદ અને બી.જે. મેડિકલ કોલેજ અસારવા અમદાવાદ સહિત અન્ય રાજ્યોમાં પણ કુલ 21 ધમકીભર્યા ઇમેઇલ્સ મોકલવામાં આવ્યા હતા.
ધમકીભર્યા ઇમેઇલ્સની વિગતો નીચે મુજબ છે:
* જીનીવા લિબરલ સ્કૂલ, સરખેજ, અમદાવાદ:
* 03-07-2025, divijprabhakaro@gmail.com
* 05-06-2025, divijprabhakaro@gmail.com
* 12-06-2025, anjanikumardoolla@proton.me
* 15-06-2025, divijpprabhakaralakshmi@gmail.com
* ઇમેઇલનો વિષય: “પોલીસ ઊંઘી રહી છે તેઓ કંઈ કરી શકતા નથી તેઓને યોગ્ય રીતે તપાસ કરતા નથી આવડતું. જો બાળકો મરશે તો જ પોલીસ સક્રિય થશે. હૈદરાબાદની લેમન ટ્રી હોટલમાં યુવતી પર બળાત્કાર કરનાર આરોપીઓ પર પોલીસનું ધ્યાન આકર્ષિત કરવા માટે અમે તમારી શાળામાં બોમ્બ ધડાકો કરવા જઈ રહ્યા છીએ”.
* નરેન્દ્ર મોદી સ્ટેડિયમ, મોટેરા, ચાંદખેડા, અમદાવાદ:
* 07-05-2025 થી 13-05-2025 દરમિયાન pakistanjkweb@gmail.com, pakistanwar@gmail.com, ipakistanwar@gmail.com, divijprabhuo285@proton.me, prabhakaradivijo@gmail.com, divijprabhuo205@gmail.com જેવા ઇમેઇલ આઈડી પરથી 13 ઇમેઇલ્સ મોકલવામાં આવ્યા હતા.
* ઇમેઇલનો વિષય: “બોમ્બ સફળતાપૂર્વક નરેન્દ્ર મોદી સ્ટેડિયમમાં ગોઠવી દેવામાં આવ્યો છે. જો તમે કરી શકો તો સ્ટેડિયમને બચાવો. ભારતમાં 1500 પ્રશિક્ષિત સૈન્ય અને સેના આ મિશન ‘ઓપરેશન સિંદૂર’ માં સામેલ છે. મહિલા અધિકારીઓ નેતૃત્વ કરી રહી છે. વિંગ કમાન્ડર વ્યોમિકા સિંહ અને કર્નલ સોફિયા કુરેશીએ ‘ઓપરેશન સિંદૂર’ પર ભારત સરકારની બ્રીફિંગનું નેતૃત્વ કર્યું. ભારત શાંતિપૂર્ણ યુદ્ધ અને તમારા પર હુમલો કરવા માટે બ્લેકઆઉટ કરી રહ્યું છે. ભારત વધુ ડ્રોન સાથે તમારા પર હુમલો કરવા તૈયાર છે. પરંતુ યુદ્ધ કરીને ભારતમાં પોલીસ કંઈ કરી શકતી નથી. અમે તમને બધા અપડેટ આપતા રહીશું”.
* દિવ્યજ્યોત સ્કૂલ, બોપલ, અમદાવાદ:
* 14-06-2025 અને 15-06-2025 ના રોજ divijpprabhakaralakshmi@gmail.com પરથી 3 ઇમેઇલ્સ મોકલવામાં આવ્યા હતા.
* ઇમેઇલનો વિષય: “સોમવારે બપોરે 1 વાગ્યે તમારી શાળામાં બોમ્બ બ્લાસ્ટ હૈદરાબાદમાં બળાત્કાર પીડિતાને ન્યાય અપાવવા માટે. અમે બળાત્કાર પીડિતા અને દહેજ પીડિતાને ન્યાય અપાવવા માટે બોમ્બ બ્લાસ્ટ કરવા જઈ રહ્યા છીએ. પોલીસ ઊંઘી રહી છે તેઓ કંઈ કરી શકતા નથી તેઓને યોગ્ય રીતે તપાસ કરતા નથી આવડતું. શનિ, 14 જૂન, 2025. જો બાળકો મરશે તો જ માતા-પિતા વિરોધ કરશે અને પોલીસ યોગ્ય તપાસ કરશે અને હૈદરાબાદની બળાત્કાર પીડિતાને ન્યાય આપશે. જો આપણે વિદ્યાર્થીઓને મારીશું તો પોલીસ પર દબાણ આવશે અને કેસની યોગ્ય તપાસ કરશે. જો બાળકો મરશે તો જ પોલીસ સક્રિય થશે”.
* બી.જે. મેડિકલ કોલેજ, અસારવા, અમદાવાદ:
* 12-06-2025 ના રોજ anjanikumardoolla@proton.me પરથી 1 ઇમેઇલ મોકલવામાં આવ્યો હતો.
* ઇમેઇલનો વિષય: “મને લાગે છે કે હવે તમે શક્તિ જાણો છો. જેમ ગઈકાલે અમે તમને મેઇલ મોકલ્યો હતો, અમે અમારા પૂર્વ મુખ્યમંત્રી સાથે એર ઇન્ડિયાનું વિમાન ક્રેશ કર્યું હતું. અમે જાણીએ છીએ કે પોલીસે વિચાર્યું હશે કે વિમાન દુર્ઘટના એક મજાક હતી અને તેને અવગણી હતી. અમારા પાઇલટને ખૂબ સરસ કામ. હવે તમે જાણો છો કે અમે રમી રહ્યા નથી. હવે તમે જાણો છો”.
આ ઉપરાંત, આરોપીએ મહારાષ્ટ્ર, રાજસ્થાન, તમિલનાડુ, દિલ્હી, કર્ણાટક, કેરળ, બિહાર, તેલંગણા, પંજાબ, મધ્યપ્રદેશ, હરિયાણા જેવા અન્ય 11 રાજ્યોમાં પણ વિવિધ સ્થળોએ બોમ્બ બ્લાસ્ટની ધમકીભર્યા ઇમેઇલ્સ મોકલ્યા હોવાનું જાણવા મળ્યું છે.
