ભારત માતાના એક વીર પુત્ર, હવાલદાર નગીનભાઈ પરમાર, જેમણે ઇન્ડિયન આર્મીની 18 મહાર રેજિમેન્ટમાં 24 વર્ષ સુધી નિર્ભય અને નિસ્વાર્થ સેવાઓ આપી, તેઓ હવે રિટાયરમેન્ટ લઈને પોતાના વતન ઓઢવના સોમનાથ સોસાયટી ખાતે ઘેર પરત ફર્યા છે. તેમની આ વિજયી વાપસી એ માત્ર તેમના પરિવાર માટે જ નહીં, પરંતુ સમગ્ર વિસ્તાર માટે સન્માન અને ગૌરવનો ક્ષણ બની રહી છે.
જેમણે દેશની રક્ષા માટે પોતાનું યુવાનપણું સમર્પિત કર્યું, એવા નગીનભાઈના ઘેર પરત ફરતા તેમના પરિવારજનો, પાડોશીઓ અને વિસ્તારના લોકોએ હર્ષ અને ગૌરવથી તેમનું ભવ્ય સ્વાગત કર્યું. ફુલહારથી લઈને લાલ કિલ્લાની યાદ અપાવે તેવો ઉત્સાહ અને દેશભક્તિનો માહોલ જોવા મળ્યો. ઢોલ-નગારાના તાલે અને જયઘોષ સાથે તેમનું સ્વાગત કરવામાં આવ્યું હતું, જે તેમની સેવાનો એક યોગ્ય સન્માન હતું.
હવાલદાર નગીનભાઈએ પોતાના આર્મી જીવન દરમિયાન અનેક અગ્નિપરીક્ષાઓ આપી છે અને પોતાના રેજિમેન્ટ માટે અમૂલ્ય યોગદાન આપ્યું છે. દેશની સરહદોની રક્ષા હોય કે પછી આંતરિક સુરક્ષાની વાત હોય, તેમણે દરેક મોરચે પોતાની ફરજ નિષ્ઠાપૂર્વક બજાવી છે. તેમનું સમર્પણ અને સેવા ખરેખર salute આપવા લાયક છે.
સ્થાનિક લોકો અને યુવાનો માટે તેઓ પ્રેરણાસ્ત્રોત છે. તેમની ઉપસ્થિતિથી વિસ્તારમાં દેશભક્તિનો માહોલ વધુ ઘેરો બન્યો છે. નિવૃત્તિ બાદ પણ તેઓ દેશસેવાના ભાવને જીવંત રાખવા કટિબદ્ધ છે. તેમણે જણાવ્યું કે હવે નિવૃત્ત જીવનમાં તેઓ સમાજસેવામાં આગળ આવી દેશસેવાના ભાવને સ્થાનિક સ્તરે આગળ વધારવા માંગે છે. તેમના આ સંકલ્પને પણ ઉપસ્થિત સૌએ બિરદાવ્યો હતો.
હવાલદાર નગીનભાઈ પરમારની આ ઘેર વાપસી એ દર્શાવે છે કે આપણા સૈનિકો માત્ર સરહદ પર જ નહીં, પરંતુ નિવૃત્તિ બાદ પણ સમાજ માટે પ્રેરણારૂપ બની શકે છે. તેમની આ સન્માનજનક વાપસી બદલ સૌ તેમને શુભેચ્છાઓ પાઠવી રહ્યા છે.
