મહેસાણા, 4 જુલાઈ, 2025: મહેસાણા જિલ્લાના ગિલોસણ ગામની ગ્રામ પંચાયતની તાજેતરની ચૂંટણીમાં ચૂંટણીપંચની ગંભીર બેદરકારી સામે આવી છે, જેના કારણે એક 21 વર્ષથી નાની વયની યુવતી સરપંચ પદે ચૂંટાઈ આવી છે. આ ઘટનાએ ગ્રામ પંચાયતની ચૂંટણી પ્રક્રિયા અને વહીવટી તંત્ર પર અનેક સવાલો ઉભા કર્યા છે.
પ્રાપ્ત માહિતી અનુસાર, અફરોજબાનું અબ્બાસમિયા સિપાઈ નામની યુવતીએ ગિલોસણ ગ્રામ પંચાયતની સરપંચ પદ માટે ઉમેદવારી નોંધાવી હતી અને તેમાં વિજય પણ મેળવ્યો હતો. જોકે, આશ્ચર્યજનક રીતે, યુવતીની ઉંમર 21 વર્ષ પૂરી ન હોવા છતાં તેને સરપંચ પદ માટે લાયક ઠેરવવામાં આવી હતી.
યુવતીએ પોતાના ફોર્મમાં પોતાની ઉંમર 21 વર્ષ દર્શાવી હતી. પરંતુ, જ્યારે તેના લિવિંગ સર્ટિફિકેટ (LC) અને આધાર કાર્ડમાં દર્શાવેલ જન્મતારીખની ચકાસણી કરવામાં આવી, ત્યારે જાણવા મળ્યું કે તેની ઉંમર હજુ 21 વર્ષ પૂરી થઈ નથી. ભારતીય કાયદા અનુસાર, ગ્રામ પંચાયતની ચૂંટણી લડવા માટે ઉમેદવારની ઉંમર ઓછામાં ઓછી 21 વર્ષ પૂર્ણ થયેલી હોવી ફરજિયાત છે.
આ મામલો પ્રકાશમાં આવતા જ જિલ્લા વહીવટી તંત્રમાં ખળભળાટ મચી ગયો છે. પ્રાંત અધિકારીએ આ અંગે જણાવ્યું હતું કે, યુવતીની ઉંમર 21 વર્ષ કરતાં ઓછી હોવાનું સામે આવ્યું છે. આ મામલે સંપૂર્ણ તપાસ કરવામાં આવશે અને તપાસના અહેવાલ બાદ કાયદેસરની કાર્યવાહી નક્કી કરવામાં આવશે. પ્રાંત અધિકારીએ વધુમાં જણાવ્યું કે, આજે ક્લેક્ટરને આ અંગેનો રિપોર્ટ સુપ્રત કરવામાં આવશે.
આ ઘટના ચૂંટણીપંચ દ્વારા ઉમેદવારોના ફોર્મની ચકાસણી પ્રક્રિયામાં રહેલી ક્ષતિઓ અને બેદરકારીને ઉજાગર કરે છે. આનાથી લોકશાહી પ્રક્રિયાની પારદર્શિતા અને નિષ્પક્ષતા પર પણ પ્રશ્નાર્થ ઊભો થાય છે. હવે જોવું રહ્યું કે આ મામલે વહીવટી તંત્ર દ્વારા શું પગલાં લેવાય છે અને શું અફરોજબાનુંનું સરપંચ પદ રદ કરવામાં આવશે કે કેમ. આ ઘટના સમગ્ર રાજ્યમાં ચર્ચાનો વિષય બની છે.
