ગાંધીનગર: ગુજરાત સરકારે રાજ્યના વહીવટી તંત્રને વધુ અસરકારક અને લોકકેન્દ્રી બનાવવા માટે એક મોટો નિર્ણય લીધો છે. મુખ્યમંત્રી ભૂપેન્દ્ર પટેલની અધ્યક્ષતામાં મળેલી કેબિનેટ બેઠકમાં 17 નવા તાલુકાઓની રચનાને મંજૂરી આપવામાં આવી છે. આ નિર્ણયથી હવે રાજ્યમાં તાલુકાઓની કુલ સંખ્યા 252થી વધીને 269 થશે. સરકારના આ પગલાથી ગ્રામીણ વિસ્તારોમાં વહીવટી સુવિધાઓ વધુ સરળતાથી ઉપલબ્ધ થશે અને નાગરિકોને લાંબા અંતરની મુસાફરી કરવી નહીં પડે.
ચૂંટણી પહેલાંનો રાજકીય દાવ?
આ નિર્ણય એવા સમયે લેવાયો છે જ્યારે સ્થાનિક સ્વરાજ્યની ચૂંટણીઓ જાન્યુઆરી-ફેબ્રુઆરી 2026માં યોજાવાની શક્યતા છે. વિપક્ષ આ નિર્ણયને ચૂંટણી પહેલાંનો રાજકીય દાવ ગણાવી રહ્યું છે, જોકે સરકારે આ દાવાઓને નકારી કાઢ્યા છે. સરકારના પ્રવક્તાએ સ્પષ્ટતા કરી છે કે આ નિર્ણયનો હેતુ માત્ર વહીવટી કાર્યક્ષમતા વધારવાનો અને પ્રજાની સુવિધા માટેનો છે. નવા તાલુકાઓ બનવાથી વહીવટી કામકાજ, જેમ કે મહેસૂલ, ગ્રામીણ વિકાસ યોજનાઓ અને અન્ય સરકારી સેવાઓનો લાભ સ્થાનિક સ્તરે જ મળી રહેશે.
કયા જિલ્લામાં કયા નવા તાલુકા?
નવા રચાયેલા 17 તાલુકાઓમાં બનાસકાંઠા અને દાહોદ જેવા જિલ્લાઓમાં વધુ તાલુકાઓનો સમાવેશ થાય છે. બનાસકાંઠા જિલ્લાના થરાદ તાલુકામાંથી રાહ, વાવ તાલુકામાંથી ધર્ણીધર, કાંકરેજમાંથી ઓગડ અને દાંતામાંથી હડદ એમ કુલ ચાર નવા તાલુકા બનાવવામાં આવ્યા છે. જ્યારે દાહોદમાં ઝાલોદમાંથી ગુરુ ગોવિંદ લિંબડી અને ફતેહપુરામાંથી સુખસર એમ બે નવા તાલુકા રચાશે.
તાલુકાવાર વિસ્તૃત યાદી:
આ નવા તાલુકાઓની સંપૂર્ણ યાદી નીચે મુજબ છે:
મહિસાગર: સંતરામપુર અને શેહરામાંથી ગોધર
પંચમહાલ: લુણાવાડામાંથી કોઠંબા
નર્મદા: ડેડિયાપાડામાંથી ચિકડા
વલસાડ: વાપી ગ્રામીણ, કપરાડા, પારડીમાંથી નાનાપોઢા
બનાસકાંઠા: થરાદમાંથી રાહ, વાવમાંથી ધર્ણીધર, કાંકરેજમાંથી ઓગડ, દાંતામાંથી હડદ
દાહોદ: ઝાલોદમાંથી ગુરુ ગોવિંદ લિંબડી, ફતેહપુરામાંથી સુખસર
છોટા ઉદેપુર: જેતપુર-પાવીમાંથી કડવલ
ખેડા: કપડવંજ, કઠલાલમાંથી ફાગવેલ
અરવલ્લી: ભિલોડામાંથી શામળાજી, બાયડમાંથી સાથંબા
તાપી: સોનગઢમાંથી ઉકાઈ
સુરત: માંડવીમાંથી અરેઠ, મહુવામાંથી અંબિકા
સરકારના આ નિર્ણયથી સ્થાનિક સ્તરે વિકાસ કાર્યોને વધુ ગતિ મળશે અને નાગરિકોની સમસ્યાઓનું નિવારણ ઝડપથી થઈ શકશે. નવા તાલુકાઓનાં મુખ્યમથકો પણ નક્કી કરી દેવામાં આવ્યા છે, જે વહીવટી કામગીરીને સરળ બનાવશે.
