અમદાવાદ: મની એક્સચેન્જના ધંધામાં વિશ્વાસઘાત અને છેતરપિંડીનો એક મોટો કિસ્સો સામે આવ્યો છે, જેમાં ૮ કરોડ ૫૦ લાખ રૂપિયાનું કૌભાંડ આચરવામાં આવ્યું છે. દિલ્હી, ઉત્તરપ્રદેશ અને ઉત્તરાખંડમાં ઇન્ફ્રાસ્ટ્રક્ચરનું કામ કરતા હરિયાણાના એક વેપારીએ અમદાવાદના એક વ્યક્તિ વિરુદ્ધ ફરિયાદ નોંધાવી છે.
શું છે સમગ્ર મામલો?
ફરીદાબાદ (હરિયાણા) ના રહેવાસી જ્યોતિપ્રસાદ સત્યનારાયણ શર્મા (ઉંમર ૪૮) એ તારીખ ૦૪/૧૦/૨૦૨૫ ના રોજ અમદાવાદ ક્રાઈમ બ્રાન્ચમાં ફરિયાદ નોંધાવી છે.
જ્યોતિપ્રસાદ શર્મા મની એક્સચેન્જ માટે અમદાવાદના વિજય ઠાકરશીભાઈ કણજરીયા ના સંપર્કમાં આવ્યા હતા. વાત એવી થઈ હતી કે, શર્માના ક્લાયન્ટના ક્રિપ્ટોકરન્સી વોલેટમાં USDT (એક પ્રકારની ક્રિપ્ટોકરન્સી) ટ્રાન્સફર કરવાની હતી.
આ ટ્રાન્સફર માટે, જ્યોતિપ્રસાદ શર્માએ તારીખ ૧૯/૦૯/૨૦૨૫ ના રોજ દિલ્હી ખાતેથી એન.આર. અને રમણસિંગ આંગડીયા મારફતે ૮,૫૦,૦૦,૦૦૦/- (સાડા આઠ કરોડ રૂપિયા) ની રકમ અમદાવાદના નવરંગપુરા વિસ્તારમાં વિજય ચાર રસ્તા પાસે આવેલી પ્રાઈમ આંગડીયા ની ઓફિસમાં ટ્રાન્સફર કરાવી હતી.
છેતરપિંડી કેવી રીતે થઈ?
આંગડીયા મારફતે મોટી રકમ ટ્રાન્સફર થયા પછી, આરોપી વિજય કણજરીયાએ શર્માના ક્લાયન્ટના વોલેટમાં USDT ટ્રાન્સફર કર્યા નહીં.
ઉપરથી, તેણે પ્રાઈમ આંગડીયામાંથી આ રકમમાંથી ₹ ૧,૦૦,૦૦,૦૦૦/- (એક કરોડ રૂપિયા) કાઢી લીધા હતા. આ પૈસા તેણે આજદિન સુધી પરત કર્યા નથી. આ રીતે વિજય કણજરીયાએ વેપારી સાથે વિશ્વાસઘાત કરીને પૈસા પડાવી લીધા હતા.
પોલીસ કાર્યવાહી
ક્રાઈમ બ્રાન્ચે જ્યોતિપ્રસાદ શર્માની ફરિયાદ નોંધીને વિશ્વાસઘાત અને છેતરપિંડીનો ગુનો દાખલ કર્યો છે. આ ગુનાની તપાસ પોલીસ સબ ઇન્સ્પેક્ટર શ્રી કે.એસ. સિસોદીયા ચલાવી રહ્યા છે.
પોલીસે હવે આંગડીયા પેઢી મારફતે થયેલા આ નાણાકીય વ્યવહાર અને ક્રિપ્ટોકરન્સી ટ્રાન્ઝેક્શનની ઊંડાણપૂર્વક તપાસ શરૂ કરી છે.
