અમદાવાદ: શહેર ક્રાઇમ બ્રાન્ચે ઘાટલોડિયા વિસ્તારમાં એક મોટી કાર્યવાહી કરીને વિદેશી દારૂના જથ્થા સાથે ક્રિકેટ સટ્ટો અને ઓનલાઇન ગેમમાં જુગાર રમાડતા એક શખ્સની ધરપકડ કરી છે. પોલીસની આ કાર્યવાહીમાં લાખો રૂપિયાનો મુદ્દામાલ પણ જપ્ત કરવામાં આવ્યો છે.
પાર્કિંગમાંથી ઝડપાયો આરોપી
અમદાવાદ ક્રાઇમ બ્રાન્ચની ટીમે બાતમીના આધારે ઘાટલોડિયાના શ્રીનગર એપાર્ટમેન્ટના પાર્કિંગમાં દરોડો પાડ્યો હતો. જ્યાંથી સન્ની ઉર્ફે માંજરો રમેશભાઈ તોલાણી (ઉંમર ૨૮) નામના શખ્સને ઝડપી પાડવામાં આવ્યો હતો. આરોપી હાલ નાના ચિલોડા વિસ્તારમાં રહે છે અને મૂળ જુનાવાડજનો વતની છે.
શું શું જપ્ત કરાયું?
પોલીસે આરોપી પાસેથી કુલ રૂપિયા ૩,૦૫,૭૮૦ નો મુદ્દામાલ જપ્ત કર્યો છે, જેમાં નીચે મુજબની વસ્તુઓનો સમાવેશ થાય છે:
વિદેશી દારૂ: રોયલ ચેલેન્જ પ્રીમિયમ ડિલક્સ વ્હિસ્કીના ૩૩૬ ક્વાટર (કિંમત રૂ. ૬૦,૪૮૦).
વાહન: એક મારુતિ સ્વિફ્ટ VXI ગાડી (કિંમત રૂ. ૨,૦૦,૦૦૦).
અન્ય: ૨ મોબાઈલ ફોન (રૂ. ૪૫,૦૦૦) અને ૩ થેલા.
ઓનલાઇન સટ્ટાનું નેટવર્ક
તપાસ દરમિયાન સામે આવ્યું કે આરોપી માત્ર દારૂનો વેપાર જ નહીં, પરંતુ માસ્ટર આઈડી દ્વારા ક્રિકેટ સટ્ટો અને ઓનલાઇન તીનપત્તીનો જુગાર પણ રમાડતો હતો. આ મામલે પોલીસે પ્રોહિબિશન એક્ટ અને જુગાર ધારા હેઠળ અલગ-અલગ ગુના નોંધી વધુ તપાસ હાથ ધરી છે.
ગુનાહિત ઇતિહાસ
ઝડપાયેલો આરોપી સન્ની ઉર્ફે માંજરો રીઢો ગુનેગાર છે. તેની સામે અગાઉ પણ વાડજ, સરખેજ, નવરંગપુરા અને એરપોર્ટ પોલીસ સ્ટેશનમાં દારૂ અને જુગારના અંદાજે ૭ જેટલા ગુનાઓ નોંધાઈ ચુક્યા છે.
