અમદાવાદ: શહેરના જુહાપુરા વિસ્તારમાં આતંકનો પર્યાય બનેલી અને ગુજસીટોક (GUJCTOC) જેવા ગંભીર ગુનાઓમાં સંડોવાયેલી “કિટલી ગેંગ” ના મુખ્ય સૂત્રધાર અઝહરુદ્દીન ઉર્ફે કિટલી ઇસ્માઇલભાઈ શેખ ને પકડવામાં પોલીસને મોટી સફળતા મળી છે. ગંભીર ગુનાઓમાં છેલ્લા ૧૫ મહિનાથી નાસતો ફરતો આ આરોપી આખરે પોલીસના સકંજામાં આવ્યો છે.
જામીન રદ થતા નાસતો ફરતો હતો
આરોપી અઝહર કિટલી વિરુદ્ધ વેજલપુર પોલીસ સ્ટેશનમાં ખંડણી, મારામારી, ધમકી અને ગુજસીટોક હેઠળ ગુનો નોંધાયેલો હતો. તે ગુજરાત હાઈકોર્ટના શરતી જામીન પર જેલની બહાર હતો, પરંતુ જામીનની શરતોનો ભંગ કરતા સ્પેશિયલ અદાલતે તેના જામીન રદ કર્યા હતા. ધરપકડથી બચવા માટે તે છેલ્લા દોઢ વર્ષથી સતત રહેઠાણ બદલીને પોલીસને હાથતાળી આપી રહ્યો હતો.
પોલીસ ઓપરેશનની વિગત
ઝોન-૭ ના ડેપ્યુટી પોલીસ કમિશનર શિવમ વર્માના સીધા માર્ગદર્શન હેઠળ ઝોન-૭ એલ.સી.બી. અને વેજલપુર પોલીસની એક સંયુક્ત ટીમ બનાવવામાં આવી હતી. ટેકનિકલ એનાલિસિસ અને બાતમીદારોની મદદથી જાણવા મળ્યું હતું કે આરોપી ખેડા જિલ્લાના માતર પાસેના ગરમાળા ગામમાં અથવા ભરૂચમાં છુપાયો છે. આ બાતમીના આધારે પોલીસે ચોક્કસ રણનીતિ ઘડીને તેને દબોચી લીધો હતો.
૨૧ થી વધુ ગુનાઓનો ઇતિહાસ
ઝડપાયેલો આરોપી રીઢો ગુનેગાર છે અને તેની સામે ૨૧ જેટલા ગંભીર ગુના નોંધાયેલા છે:
ખૂનની કોશિશ: કલમ ૩૦૭ હેઠળ અનેક ગુના.
ખંડણી અને લૂંટ: લોકોને ડરાવી-ધમકાવી જમીન-મકાન પચાવી પાડવા.
ગેરકાયદે હથિયાર: હથિયાર ધારા (આર્મ્સ એક્ટ) હેઠળ ગુના.
ગુજસીટોક: સંગઠિત ગેંગ બનાવી આતંક ફેલાવવો.
સફળ કામગીરી કરનાર ટીમ
આ કામગીરીમાં ઝોન-૭ એલ.સી.બી.ના પી.આઈ. વાય.પી. જાડેજા, વેજલપુર પી.આઈ. આર.એમ. ચૌહાણ તેમજ સ્ટાફના રવિરાજસિંહ અને નાગરાજભાઈ સહિતના જવાનોએ મહત્વની ભૂમિકા ભજવી છે
