અમદાવાદ:
શહેરમાં વધતી જતી ઘરફોડ ચોરીની ઘટનાઓને ડામવા માટે અમદાવાદ પોલીસ કમિશનરની સૂચના હેઠળ નારોલ પોલીસે સપાટો બોલાવ્યો છે. નારોલ પોલીસ સ્ટેશનના પી.આઈ. પી.સી. દેસાઈ અને તેમની ટીમ દ્વારા ટેકનિકલ એનાલિસિસ અને હ્યુમન ઇન્ટેલિજન્સ (બાતમીદારો) ના આધારે ઘરફોડ ચોરીના વણઉકેલાયેલા ગુનાનો ભેદ ઉકેલી નાખવામાં આવ્યો છે.
ઝડપાયેલા આરોપીઓની વિગત
પોલીસે આ મામલે બે શખ્સોની ધરપકડ કરી છે, જેઓ અગાઉ પણ અનેક ગુનાઓમાં સંડોવાયેલા છે:
પ્રવિણસિંહ ઉર્ફે પપ્પુ ચોર (ઉં.વ. 40): આ આરોપી રાજપૂત જ્ઞાતિનો છે અને હાલ વટવા વિસ્તારમાં રહે છે. તેની સામે અગાઉ ઇસનપુર, વટવા અને ગાંધીનગરના અડાલજ પોલીસ સ્ટેશનમાં દારૂ, જુગાર, ચોરી અને લૂંટ જેવા 23 થી વધુ ગુનાઓ નોંધાયેલા છે. તે 7 વખત પાસા (PASA) હેઠળ જેલ પણ જઈ આવ્યો છે.
સુનીલ રઘુભાઈ ઠાકોર (ઉં.વ. 23): આ આરોપી મૂળ પાટણ જિલ્લાના રાધનપુરનો વતની છે અને હાલ નારોલ વિસ્તારમાં રહે છે.
રિકવર કરવામાં આવેલો મુદ્દામાલ
પોલીસે આરોપીઓ પાસેથી સોના-ચાંદીના દાગીના, ટીવી અને રિક્ષા મળી કુલ ₹11,21,080ની કિંમતનો મુદ્દામાલ કબજે કર્યો છે:
સોનાના દાગીના: સોનાનો હાર (સેટ), સોનાની ચેઈન, બુટ્ટીની જોડો, વીંટી અને બંગડીઓ (કિંમત આશરે ₹7.61 લાખ).
ચાંદીના દાગીના: ચાંદીના છડા (4 જોડી), કમરનો ઝુડો, ચાંદીના વેઢ અને અન્ય નાની વસ્તુઓ (કિંમત આશરે ₹2.75 લાખ).
અન્ય વસ્તુઓ: 55 ઈંચનું LG કંપનીનું સ્માર્ટ ટીવી (₹25,000) અને ગુનામાં વપરાયેલી બજાજ ઓટો રિક્ષા (₹60,000).
તપાસની કામગીરી
આ સફળ કામગીરીમાં નારોલ પોલીસના પીએસઆઈ આર.ડી. સાંભડ, પીએસઆઈ એસ.એન. શેરસિયા તેમજ હેડ કોન્સ્ટેબલ સૂરપાલસિંહ, નરેન્દ્રસિંહ અને કોન્સ્ટેબલ સંજયભાઈ, હરદેવસિંહ તથા અર્જણજીનો મહત્વનો ફાળો રહ્યો છે.
આ ધરપકડથી નારોલ અને આસપાસના વિસ્તારોમાં થતી ઘરફોડ ચોરીની ઘટનાઓ પર અંકુશ આવવાની શક્યતા છે.
