અમદાવાદ: શહેરમાં ગેરકાયદેસર પ્રવૃત્તિઓ અને જુગારના દૂષણને નાબૂદ કરવા માટે પોલીસ કમિશનર જી.એસ. મલિક અને ઉચ્ચ અધિકારીઓની સૂચના બાદ પોલીસ એક્શન મોડમાં આવી છે. આ દરમિયાન એરપોર્ટ પોલીસ સ્ટેશનની ટીમે બાતમીના આધારે રેડ કરી જુગાર રમતા પાંચ શખ્સોને મુદ્દામાલ સાથે ઝડપી પાડ્યા છે.
ગુપ્ત બાતમીના આધારે કાર્યવાહી
ઝોન-4 DCP અતુલકુમાર બંસલ દ્વારા પ્રોહિબિશન અને જુગાર અંગે ડ્રાઈવ રાખવામાં આવી હતી. આ અંતર્ગત એરપોર્ટ પોલીસ સ્ટેશનના ઈન્ચાર્જ PI એન.ડી. નકુમના માર્ગદર્શન હેઠળ સર્વેલન્સ સ્ક્વોડના PSI પી.જી. ચાવડા અને તેમની ટીમ પેટ્રોલિંગમાં હતી.
પેટ્રોલિંગ દરમિયાન કોન્સ્ટેબલ રણછોડભાઈ અને દેવશીભાઈને બાતમી મળી હતી કે, ભાડજ વિસ્તારમાં આવેલા રામાવાળા હાઉસિંગ, વણઝારાવાસ પાસે અજય દેવીપૂજકના ઘરની પાછળ ખુલ્લા મેદાનમાં કેટલાક લોકો જુગાર રમી રહ્યા છે.
ઝડપાયેલ મુદ્દામાલ અને આરોપીઓ
પોલીસે તાત્કાલિક સ્થળ પર દરોડો પાડી મુકેશભાઈ ચતુરભાઈ વાઘરી (ઉં.વ. 46) સહિત કુલ 5 શખ્સોને ગંજીપાના વડે હાર-જીતનો જુગાર રમતા રંગેહાથ ઝડપી લીધા હતા. પોલીસને તપાસ દરમિયાન નીચે મુજબનો મુદ્દામાલ મળી આવ્યો છે:
અંગ ઝડતીમાંથી મળેલ રોકડ: ₹10,000
દાવ પર લાગેલી રોકડ: ₹1,800
કુલ મુદ્દામાલ: ₹11,800
અન્ય સાધનો: ગંજીપાના (52 નંગ)
કાયદેસરની કાર્યવાહી
આ મામલે એરપોર્ટ પોલીસે તમામ આરોપીઓ વિરુદ્ધ જુગારધારા કલમ-12 મુજબ ગુનો નોંધી કાયદેસરની કાર્યવાહી હાથ ધરી છે. આ સફળ કામગીરીમાં PSI પી.જી. ચાવડા, સંજયભાઈ, યોગેશકુમાર સહિત 15 જેટલા પોલીસ કર્મીઓની ટીમ જોડાઈ હતી.
