અમદાવાદ: શહેરના વસ્ત્રાપુર વિસ્તારમાં બનેલી પિસ્તોલ ચોરીની ગંભીર ઘટનામાં વસ્ત્રાપુર પોલીસને મોટી સફળતા મળી છે. પોલીસે ટેકનિકલ સર્વેલન્સ અને બાતમીદારોની મદદથી ગણતરીના કલાકોમાં જ ચોરીનો ભેદ ઉકેલી નાખ્યો છે અને મુદ્દામાલ સાથે એક આરોપીની ધરપકડ કરી છે.
શું હતી સમગ્ર ઘટના?
ગત તારીખ ૧૪/૦૩/૨૦૨૬ના રોજ વસ્ત્રાપુર પોલીસ સ્ટેશનમાં ભારતીય ન્યાય સંહિતા ૨૦૨૩ની કલમ ૩૦૬ મુજબ પિસ્તોલ ચોરીનો ગુનો (ગુ.ર.નં. ૧૧૧૯૧૦૨૦૨૬૦૦૮૮/૨૦૨૬) દાખલ કરવામાં આવ્યો હતો. શહેરના ઉચ્ચ પોલીસ અધિકારીઓ દ્વારા મિલકત સંબંધી ગુનાઓ શોધી કાઢવાની મળેલી સૂચના બાદ વસ્ત્રાપુર પોલીસ એક્શનમાં આવી હતી.
પોલીસ તપાસ અને આરોપીની ધરપકડ
વસ્ત્રાપુર પોલીસ સ્ટેશનના ઇન્ચાર્જ પી.આઈ. જી.એમ. ચૌધરીના માર્ગદર્શન હેઠળ સર્વેલન્સ સ્વોર્ડના પી.એસ.આઈ. એમ.બી. ગઢવી અને તેમની ટીમે તપાસ તેજ કરી હતી. શંકાના આધારે ઘાટી તરીકે કામ કરતા મહિપાલસિંહ અર્જુનસિંહ સિસોદિયા (ઉં.વ. ૨૨, રહે. ગોહાવાડા, ઉદયપુર, રાજસ્થાન) ની અટકાયત કરી યુક્તિ-પ્રયુક્તિથી પૂછપરછ હાથ ધરી હતી. પોલીસની કડક પૂછપરછમાં આરોપી ભાંગી પડ્યો હતો અને પિસ્તોલ ચોરી કરી હોવાની કબૂલાત કરી હતી.
કબ્જે કરવામાં આવેલ મુદ્દામાલ
પોલીસે આરોપી પાસેથી નીચે મુજબનો મુદ્દામાલ જપ્ત કર્યો છે:
કિંમતી પિસ્તોલ: Colt Automatic Caliber 25 (કિંમત અંદાજે ₹૨,૫૦,૦૦૦/-)
કવર: મરૂણ કલરનું લેધરનું પિસ્તોલ કવર.
કારતૂસ: ૧૨ નંગ જીવતા રાઉન્ડ.
કામગીરી કરનાર ટીમ
આ સફળ કામગીરીમાં પી.આઈ. જી.એમ. ચૌધરી, પી.એસ.આઈ. એમ.બી. ગઢવી સહિત એ.એસ.આઈ. નિરાજસિંહ, પરિભદ્રસિંહ, મિહિરભાઈ તથા હેડ કોન્સ્ટેબલ ભરતસિંહ, પ્રવીણકુમાર, અતુલકુમાર, કપિલકુમાર, વિપુલભાઈ, મોન્ટુભાઈ અને નયનસિંહ જોડાયા હતા.
આગળની કાર્યવાહી: વસ્ત્રાપુર પોલીસ હાલ આરોપીની વધુ પૂછપરછ કરી રહી છે કે આ પિસ્તોલનો ઉપયોગ અન્ય કોઈ ગુનામાં કરવાનો હતો કે કેમ.
