સુરત: સુરત જિલ્લાના કામરેજ તાલુકાના પરબ ગામની હદમાં આવેલા ઓમ ટેક્ષટાઈલ પાર્ક-૩ માં એક ચોંકાવનારો કિસ્સો સામે આવ્યો છે. સુરત જિલ્લા એલ.સી.બી. (LCB) અને પેરોલ ફર્લો સ્ક્વોડની ટીમે સંયુક્ત ઓપરેશન હાથ ધરીને જાણીતી ‘Lizol’ બ્રાન્ડના નામે ડુપ્લીકેટ ક્લીનર બનાવતા રેકેટનો પર્દાફાશ કર્યો છે. પોલીસે ઘટનાસ્થળેથી ૧૦ લાખથી વધુની કિંમતનો મુદ્દામાલ જપ્ત કરી એક વ્યક્તિની અટકાયત કરી છે.
શું હતો સમગ્ર મામલો?
પોલીસ સૂત્રોના જણાવ્યા અનુસાર, સુરત રેન્જના પોલીસ મહાનિરીક્ષક અને સુરત ગ્રામ્ય પોલીસ અધિક્ષક રાજેશ ગઢિયા દ્વારા જિલ્લામાં ગુનાખોરી ડામવા માટે સૂચના આપવામાં આવી હતી. આ દરમિયાન એલ.સી.બી. અને પેરોલ ફર્લો સ્ક્વોડની ટીમો પેટ્રોલીંગમાં હતી, ત્યારે તેમને ચોક્કસ બાતમી મળી હતી કે પરબ ગામમાં ‘માપા ફેશન’ નામની પેઢી કોસ્મેટિક પ્રોડક્ટના નામે નકલી ક્લીનર બનાવી રહી છે.
પોલીસે બાતમીવાળી જગ્યાએ ઓમ ટેક્ષટાઈલ પાર્ક-૩ ના પ્લોટ નં. ૧૮૪-૧૮૫ માં બીજા માળે દરોડો પાડ્યો હતો. તપાસ દરમિયાન જાણવા મળ્યું કે, અહીં કોસ્મેટિક પ્રોડક્ટ બનાવવાની આડમાં જાણીતી બ્રાન્ડ ‘Lizol’ ના નકલી ક્લીનર તૈયાર કરવામાં આવતા હતા. આરોપીઓ પ્લાસ્ટિકના કેનમાં નકલી પ્રવાહી ભરી તેના પર ઓરિજિનલ કંપનીના લેબલ લગાવી ગ્રાહકોને ઉંચા ભાવે વેચીને છેતરપિંડી કરતા હતા.
જપ્ત કરાયેલ મુદ્દામાલ (કુલ કિંમત રૂ. ૧૦,૭૨,૦૩૦/-)
પોલીસે દરોડા દરમિયાન નીચે મુજબનો મુદ્દામાલ કબજે કર્યો છે:
Lizol ક્લીનર ભરેલા કેન: ૮૬૦ નંગ (રૂ. ૮,૫૯,૧૪૦)
ખાલી પ્લાસ્ટિક કેન: ૫૨ નંગ (રૂ. ૧,૦૪૦)
કંપનીના વિવિધ સ્ટીકરો: રૂ. ૮,૧૦૦
કેમિકલ (SLES): ૧૦૦ લીટર (રૂ. ૮,૦૦૦)
મશીનરી: બે લિક્વિડ બનાવવાની મશીન અને ત્રણ પેકિંગ મશીન (કુલ રૂ. ૧,૨૫,૦૦૦)
અન્ય: મોબાઈલ ફોન અને અન્ય સામગ્રી.
આરોપીની ઓળખ
આ સમગ્ર કૌભાંડનો માસ્ટરમાઇન્ડ મોનીલ સંજયભાઈ ધોડીયા (ઉ.વ. ૨૩) હોવાનું બહાર આવ્યું છે. તે મૂળ ગારિયાધાર (ભાવનગર) નો વતની છે અને હાલ સીમાડા ગામ, સુરત ખાતે રહે છે. આરોપી સામે કાયદેસરની કાર્યવાહી હાથ ધરીને કંપનીના અધિકૃત પ્રતિનિધિઓનો પણ સંપર્ક કરવામાં આવ્યો છે.
આ કામગીરીમાં સુરત ગ્રામ્ય એલ.સી.બી. અને પેરોલ ફર્લો સ્ક્વોડના પોલીસ ઇન્સ્પેક્ટરો આર.બી. ભટોળ, એમ.આર. શકોરીયા, એલ.જી. રાઠોડ તથા તેમની ટીમના અન્ય પોલીસ કર્મચારીઓએ સક્રિય ભૂમિકા ભજવી હતી.
આવા પ્રકારના નકલી પ્રોડક્ટ્સ બનાવનારાઓ સામે પોલીસે કડક કાર્યવાહી શરૂ કરી છે, જેથી ભવિષ્યમાં લોકો સાથે થતી છેતરપિંડી અટકાવી શકાય.
