અમદાવાદ: અમદાવાદ ગ્રામ્યના ચાંગોદર પોલીસ સ્ટેશન દ્વારા નશીલા પદાર્થો વિરુદ્ધ કરવામાં આવેલી કામગીરીમાં સફળતા મળી છે. ચાંગોદર પોલીસે પ્રતિબંધિત મેફેડ્રોન અને મેથએમ્ફેટેમાઇન ડ્રગ્સ સાથે એક આરોપીને ઝડપી પાડીને કાયદેસરની કાર્યવાહી હાથ ધરી છે.
શું છે સમગ્ર મામલો?
અમદાવાદ રેન્જના પોલીસ મહાનિરીક્ષક અને અમદાવાદ ગ્રામ્યના પોલીસ અધિક્ષકના માર્ગદર્શન હેઠળ, ચાંગોદર પોલીસ વિસ્તારમાં નશીલા પદાર્થોની બદી ડામવા માટે સઘન પેટ્રોલિંગ કરી રહી હતી. આ દરમિયાન ચાંગોદર પોલીસ સ્ટેશનના કર્મચારીઓને બાતમી મળી હતી કે, મોરૈયા ગામ વિસ્તારમાં રહેતો એક શખ્સ નશીલા પદાર્થોનું વેચાણ કરે છે.
પોલીસ કાર્યવાહી:
પોલીસની ટીમે બાતમીના આધારે રામનિવાસ ઈન્દ્રરામ રાઈકા (રહે. રામદેવ રેસીડેન્સી, મોરૈયા ગામ) ને ઝડપી પાડ્યો હતો. તેની તપાસ કરતા તેની પાસેથી ૧૧.૫૦ ગ્રામ વજનનું શંકાસ્પદ ડ્રગ્સ મળી આવ્યું હતું. F.S.L. અધિકારીની હાજરીમાં તપાસ કરતા આ પદાર્થ મેફેડ્રોન (Mephedrone) અને મેથએમ્ફેટેમાઇન (Methamphetamine) હોવાનું સામે આવ્યું હતું.
મુદ્દામાલ અને આરોપીની વિગત:
ઝડપાયેલ મુદ્દામાલ: ૧૧.૫૦ ગ્રામ ડ્રગ્સ (કિંમત ₹૩૪,૫૦૦) અને એક મોબાઈલ ફોન (કિંમત ₹૫,૦૦૦), મળીને કુલ ₹૩૯,૫૦૦નો મુદ્દામાલ જપ્ત કરવામાં આવ્યો છે.
આરોપીની મોડસ ઓપરેન્ડી (M.O.): પકડાયેલ આરોપી રાજસ્થાનના નાગોર જિલ્લાના રહેવાસી ‘પીન્ટુ’ નામના વોન્ટેડ આરોપી પાસેથી ડ્રગ્સ મેળવીને આર્થિક ફાયદા માટે વેચાણ કરતો હોવાનું તપાસમાં ખુલ્યું છે.
ચાંગોદર પોલીસે એન.ડી.પી.એસ. (N.D.P.S.) એક્ટની વિવિધ કલમો હેઠળ ગુનો નોંધીને વધુ તપાસ હાથ ધરી છે.
