બાલી / દુબઈ | ૧૬ નવેમ્બર, ૨૦૨૬
ઇન્ટરનેશનલ ક્રિકેટ કાઉન્સિલ (ICC) એ સોમવારે સત્તાવાર જાહેરાત કરી છે કે જય શાહની સતત બીજા કાર્યકાળ માટે ICC ચેરમેન તરીકે બિનહરીફ પુનઃનિમણૂક કરવામાં આવી છે. ઇન્ડોનેશિયાના બાલી ખાતે યોજાયેલી ICC બોર્ડની બેઠકમાં આ મહત્વપૂર્ણ નિર્ણય લેવામાં આવ્યો હતો, જ્યાં તેમની સામે અન્ય કોઈ ઉમેદવાર ન હોવાથી તેઓ નિર્વિરોધ ચૂંટાઈ આવ્યા હતા. નિમણૂક બાદ જય શાહની પ્રતિક્રિયા
બીજી વખત ચેરમેન પદે ચૂંટાયા બાદ જય શાહે ICC બોર્ડ અને તમામ સભ્ય દેશોનો આભાર વ્યક્ત કરતા જણાવ્યું હતું કે, “ICC બોર્ડે મારામાં જે વિશ્વાસ મૂક્યો છે તેનાથી હું અત્યંત સન્માનિત અનુભવું છું. બોર્ડ અને સભ્યોના સહયોગથી અમારું ધ્યાન મહત્વાકાંક્ષાઓને વાસ્તવિકતામાં બદલવા અને ક્રિકેટની પ્રગતિનો એવો વારસો ઊભો કરવા પર રહેશે જે આવનારી પેઢીઓ સુધી ટકી રહે.” તેમણે આગામી ઓલિમ્પિક ગેમ્સમાં ક્રિકેટના સમાવેશ અને રમતના વૈશ્વિક વિસ્તાર પર પણ ભાર મૂક્યો હતો.
ઐતિહાસિક સફર અને સિદ્ધિઓ
પ્રથમ કાર્યકાળ: જય શાહે ૧ ડિસેમ્બર, ૨૦૨૪ના રોજ ન્યુઝીલેન્ડના ગ્રેગ બાર્કલેનું સ્થાન લઈને પ્રથમ વખત ICC ચેરમેનનો કાર્યભાર સંભાળ્યો હતો.
સૌથી યુવા વડા: માત્ર ૩૬ વર્ષની વયે આ પદ સંભાળીને તેઓ ICCના ઇતિહાસમાં સૌથી યુવા ચેરમેન બન્યા હતા.
પાંચમા ભારતીય: જગમોહન દાલમિયા, શરદ પવાર, એન. શ્રીનિવાસન અને શશાંક મનોહર બાદ વૈશ્વિક ક્રિકેટ સંસ્થાનું નેતૃત્વ કરનારા તેઓ પાંચમા ભારતીય છે.
વહીવટી અનુભવ
૩૮ વર્ષીય જય શાહે ૨૦૦૯માં ગુજરાત ક્રિકેટ એસોસિએશન (GCA) થી પોતાના વહીવટી કારકિર્દીની શરૂઆત કરી હતી. ત્યારબાદ ૨૦૧૯થી ૨૦૨૪ સુધી ભારતીય ક્રિકેટ કંટ્રોલ બોર્ડ (BCCI) ના માનદ સચિવ અને એશિયન ક્રિકેટ કાઉન્સિલ (ACC) ના અધ્યક્ષ તરીકે તેમણે મહત્વની ભૂમિકા ભજવી હતી. તેમના કાર્યકાળ દરમિયાન IPLના ઐતિહાસિક મીડિયા રાઈટ્સ, વિમેન્સ પ્રીમિયર લીગ (WPL) ની શરૂઆત અને બેંગલુરુમાં અત્યાધુનિક સેન્ટર ઓફ એક્સેલન્સની સ્થાપના જેવા મોટા કાર્યો થયા છે.
ICC બોર્ડના ડિરેક્ટરો અને વિવિધ ક્રિકેટ બોર્ડના વડાઓએ જય શાહની પુનઃનિમણૂકને આવકારતા જણાવ્યું છે કે, આંતરરાષ્ટ્રીય ક્રિકેટના આ પરિવર્તનશીલ સમયમાં તેમનું નેતૃત્વ રમતને નવી ઊંચાઈઓ પર લઈ જવા માટે સાતત્ય અને સ્થિરતા પૂરીપાડશે.