અમદાવાદ: શહેરમાં ગેરકાયદેસર પ્રવૃત્તિઓ ડામવા માટે પોલીસ કમિશનર જી.એસ. મલીક અને ક્રાઈમ બ્રાંચના ઉચ્ચ અધિકારીઓના માર્ગદર્શન હેઠળ અમદાવાદ સાયબર ક્રાઈમ દ્વારા મોટી સફળતા મેળવવામાં આવી છે. ચાંદખેડા વિસ્તારમાં રેસીડેન્શિયલ મકાનમાંથી વિદેશી નાગરિકોને શિકાર બનાવતા એક હાઈટેક કોલ સેન્ટર પર દરોડો પાડી ૪ શખ્સોની ધરપકડ કરવામાં આવી છે.
કેવી રીતે આચરતા હતા ઠગાઈ?
પકડાયેલા આરોપીઓ “EYE BEAM” નામના VOIP સોફ્ટવેરનો ઉપયોગ કરીને કેનેડિયન નાગરિકોને કોલ કરતા હતા. તેઓ પોતાની ઓળખ કેનેડા રેવન્યુ એજન્સી (CRA) ના અધિકારી તરીકે આપી નીચે મુજબની પદ્ધતિ અપનાવતા હતા:
નાગરિકોને ડરાવવામાં આવતા કે તેમના બેંક ખાતામાંથી કોઈ અજાણી વ્યક્તિ નાણાં ઉપાડી રહી છે.
”Identity Theft” (ઓળખ ચોરી) ના નામે ભોગ બનનારનો વિશ્વાસ જીતી તેમની ખાનગી વિગતો મેળવી લેતા.
ત્યારબાદ તપાસ અને પ્રોસેસના બહાને જુદી-જુદી કંપનીના ગિફ્ટ કાર્ડ ખરીદાવી તેના મારફતે નાણાં પડાવી લેતા હતા.
ઝડપાયેલા આરોપીઓ અને મુદ્દામાલ
પોલીસે ચાંદખેડાના સોપાન હાઈટ્સ ખાતેથી કુશ પટેલ, હર્ષ પટેલ, આશુ પટેલ અને સુનિલ રાવત નામના ચાર શખ્સોને ઝડપી પાડ્યા છે. દરોડા દરમિયાન પોલીસે નીચે મુજબનો મુદ્દામાલ જપ્ત કર્યો છે:
૬ લેપટોપ
૫ મોબાઈલ ફોન
૪ ટેલિફોન અને અન્ય ઇલેક્ટ્રોનિક સાધનો (કુલ કિંમત આશરે ₹૧,૮૭,૨૦૦)
મુખ્ય સૂત્રધારની શોધખોળ ચાલુ
તપાસમાં બહાર આવ્યું છે કે આ નેટવર્કનો મુખ્ય સૂત્રધાર ફાલ્ગુન પટેલ છે, જે આ આરોપીઓને માસિક ₹૨૦,૦૦૦ પગાર અને ઇન્સેન્ટિવ આપી કામ કરાવતો હતો. આરોપી હર્ષ પટેલ અગાઉ ૨૦૨૫માં ઉદયપુરમાં પણ આવા જ ગુનામાં ઝડપાઈ ચુક્યો છે. હાલ પોલીસે તમામ આરોપીઓના ૫ દિવસના રિમાન્ડ મેળવી વધુ તપાસ હાથ ધરી છે.
