અમદાવાદ: શહેરના નરોડા વિસ્તારમાં પોલીસે બાતમીના આધારે કાર્યવાહી કરીને ભારત સરકાર દ્વારા બંધ કરવામાં આવેલી જૂની ચલણી નોટોનો મોટો જથ્થો ઝડપી પાડ્યો છે. આ મામલે પોલીસે બે મુખ્ય આરોપીઓની અટકાયત કરી કુલ ૬ વ્યક્તિઓ વિરુદ્ધ કાયદેસરની કાર્યવાહી હાથ ધરી છે.
શું છે સમગ્ર મામલો?
નરોડા પોલીસ ઇન્સ્પેક્ટર પી.વી. ગોહીલના માર્ગદર્શન હેઠળ ગત ૩ માર્ચ, ૨૦૨૬ના રોજ પી.એસ.આઈ. વી.આર. ચૌધરી અને તેમની ટીમે તપાસ હાથ ધરી હતી. આ દરમિયાન એક કાર (નંબર GJ-02-CP-4996) માંથી રદ થયેલી ૫૦૦ ના દરની ૯૧૦૦ નોટો અને ૧૦૦૦ ના દરની ૪૩૫૦ નોટો મળી આવી હતી.
કુલ રોકડ: ₹૮૯,૦૦,૦૦૦ (જૂની નોટો)
કારની કિંમત: ₹૧,૦૦,૦૦૦
કુલ મુદ્દામાલ: ₹૯૦,૦૦,૦૦૦
આરોપીઓની ધરપકડ અને કાયદાકીય કાર્યવાહી
પોલીસે સ્થળ પરથી બે શખ્સો, અનીલ લીલાભાઇ દેસાઈ (રબારી) અને કૃષ્ણપાલસિંહ ભાવસિંહ સોઢા (બંને રહે. જુના માંકા, તા. હારીજ, જી. પાટણ) ને ઝડપી પાડ્યા હતા. આ બંને શખ્સો અભ્યાસ કરે છે તેમ પૂછપરછમાં બહાર આવ્યું છે.
શરૂઆતમાં આ શખ્સોને ભારતીય નાગરિક સુરક્ષા સંહિતા-૨૦૨૩ની કલમ ૩૫(૧)ઇ મુજબ અટકાયત કરી જામીન મુક્ત કરાયા હતા. જોકે, નોટોની માલિકી અંગેના પુરાવા રજૂ કરવામાં નિષ્ફળ રહેતા, પોલીસે હવે કુલ ૬ આરોપીઓ વિરુદ્ધ ‘ધ સ્પેશીફાઈડ બેંક નોટસ (સેશેસન ઓફ લાયેબીલીટીઝ) એક્ટ ૨૦૧૭’ ની કલમ ૭ મુજબ NC (Non-Cognizable) ગુનો દાખલ કર્યો છે.
તપાસ હેઠળના અન્ય આરોપીઓ:
૧. અનીલ લીલાભાઇ દેસાઈ
૨. કૃષ્ણપાલસિંહ ભાવસિંહ સોઢા
૩. લક્ષમણભાઇ રૂપાભાઇ દેસાઈ
૪. જયેશ ઉર્ફે જય ગોવિંદભાઇ પટેલ
૫. મુકેશભાઇ રબારી
૬. જીતેન્દ્રસિંહ રાઠોડ
હાલ નરોડા પોલીસે આ મામલે વધુ તપાસ કરવા માટે નામદાર કોર્ટ પાસેથી મંજૂરી મેળવવાની તજવીજ હાથ ધરી છે.
