અમદાવાદ/રાજકોટ: ગુજરાત પોલીસ ભરતી બોર્ડ દ્વારા હાથ ધરાયેલી PSI (પોલીસ સબ ઇન્સ્પેક્ટર) કેડરની 858 જગ્યાઓ માટે આજે રવિવારે રાજ્યના ચાર મુખ્ય શહેરોમાં લેખિત પરીક્ષાનું આયોજન કરવામાં આવ્યું છે. શારીરિક કસોટીમાં ઉત્તીર્ણ થયેલા કુલ 1,10,680 ઉમેદવારો આજે પોતાની બૌદ્ધિક ક્ષમતાનું પ્રદર્શન કરશે. પરીક્ષામાં કોઈપણ પ્રકારની ગેરરીતિ ન થાય તે માટે વહીવટી તંત્ર દ્વારા ‘લોખંડી’ સુરક્ષા વ્યવસ્થા ગોઠવવામાં આવી છે.
પરીક્ષાની મહત્વની વિગતો:
કુલ જગ્યાઓ: 858 (બિન હથિયારી પો.સ.ઇ., હથિયારી પો.સ.ઇ. અને જેલર ગ્રુપ-2)
કુલ ઉમેદવારો: 1,10,680 (જેઓએ 21 જાન્યુઆરીથી 9 ફેબ્રુઆરી દરમિયાન યોજાયેલી શારીરિક કસોટી પાસ કરી છે)
પરીક્ષા કેન્દ્રો: રાજ્યના 4 શહેરો (અમદાવાદ, વડોદરા, સુરત અને રાજકોટ)ની કુલ 371 શાળાઓમાં.
સ્ટાફ: 4,000 જેટલા પોલીસ અધિકારી/કર્મચારીઓ અને 8,000 જેટલા શિક્ષણ વિભાગના કર્મચારીઓ તૈનાત.
ટેકનોલોજી દ્વારા ગેરરીતિ પર કડક નજર
ભરતી બોર્ડ દ્વારા પારદર્શિતા જાળવવા માટે આધુનિક ટેકનોલોજીનો વ્યાપક ઉપયોગ કરવામાં આવ્યો છે:
બાયોમેટ્રિક અને ફેસિયલ રેકગ્નિશન: શારીરિક કસોટી વખતે લેવામાં આવેલા ડેટાનું લેખિત પરીક્ષા પહેલા બે વખત વેરિફિકેશન કરવામાં આવશે.
GPS ટ્રેકિંગ: પરીક્ષાની સામગ્રી (પેપર વગેરે) લઈ જતાં તમામ વાહનોને GPS દ્વારા ટ્રેક કરવામાં આવશે, જેનું મોનીટરીંગ કરાઈ (ગાંધીનગર) સ્થિત સેન્ટ્રલ કંટ્રોલ રૂમથી થશે.
CCTV મોનીટરીંગ: તમામ પરીક્ષા કેન્દ્રો અને વર્ગખંડો CCTV કેમેરાની સતત દેખરેખ હેઠળ રહેશે.
ઉચ્ચ અધિકારીઓનું સુપરવિઝન
દરેક પરીક્ષા કેન્દ્ર પર PI અથવા PSI કક્ષાના એક અધિકારીને ભરતી બોર્ડના પ્રતિનિધિ તરીકે નિયુક્ત કરવામાં આવ્યા છે. સમગ્ર પરીક્ષા પ્રક્રિયાનું નિરીક્ષણ IGP/DIGP કક્ષાના સિનિયર પોલીસ અધિકારીઓની અધ્યક્ષતામાં કરવામાં આવી રહ્યું છે. ઉમેદવારોની સુવિધા માટે હેલ્પલાઈન નંબરો પણ જાહેર કરવામાં આવ્યા છે.
ભરતી બોર્ડે સ્પષ્ટ ચેતવણી આપી છે કે પરીક્ષામાં ગેરરીતિ કરનાર કોઈપણ વ્યક્તિ વિરુદ્ધ કડક કાયદેસરની કાર્યવાહી કરવામાં આવશે. હાલમાં પરીક્ષા શાંતિપૂર્ણ વાતાવરણમાં યોજાય તે માટેની તમામ તૈયારીઓ પૂર્ણ કરી લેવામાં આવી છે.
