અમદાવાદ:
અમદાવાદ શહેર ક્રાઇમ બ્રાન્ચ દ્વારા આંતરરાજ્ય ફરાર આરોપીઓને ઝડપી પાડવા માટે વિશેષ કામગીરી હાથ ધરવામાં આવી છે. આ દરમિયાન ક્રાઇમ બ્રાન્ચને રાજસ્થાન રાજ્યના ચોરીના ગુનામાં છેલ્લા ૧૭ વર્ષથી નાસતા ફરતા એક વોન્ટેડ આરોપીને પકડવામાં મોટી સફળતા મળી છે. આ આરોપી વિરુદ્ધ કોટા કોર્ટ દ્વારા સી.આર.પી.સી.-૭૦ મુજબનું વોરંટ કાઢવામાં આવ્યું હતું.
ગુનાહિત ઇતિહાસ ધરાવતો કુખ્યાત રીઢો ગુનેગાર
અમદાવાદ શહેર ક્રાઇમ બ્રાન્ચ દ્વારા આ આરોપી બાબતે વર્કઆઉટ કરતા એવું સામે આવ્યું હતું કે, આ શખ્સ રાજસ્થાન, ગુજરાત તેમજ અન્ય અલગ-અલગ રાજ્યોમાં ચોરીના ગુનાઓ કરવાની આદત ધરાવતો રીઢો ગુનેગાર છે.
ટેકનિકલ અને હ્યુમન સોર્સિસના આધારે કરવામાં આવેલી તપાસમાં ખુલાસો થયો કે આરોપી છેલ્લા ૧૭ વર્ષથી રાજસ્થાન રાજ્ય ખાતે ચોરીનો ગુનો આચર્યા બાદ ગુજરાતમાં આવીને અમદાવાદ શહેરમાં અલગ-અલગ જગ્યાએ છુપાતો રહેતો હતો.
વોચ ગોઠવીને ઝડપી પાડ્યો
આ માહિતીના આધારે અમદાવાદ શહેર ક્રાઇમ બ્રાન્ચે તેના પર જરૂરી વોચ ગોઠવીને રાજસ્થાન રાજ્યના ચોરીના ગુનામાં છેલ્લા ૧૭ વર્ષથી નાસતા ફરતા આ આરોપીને ઝડપી પાડ્યો છે. ત્યારબાદ કાયદેસરની કાર્યવાહી પૂરી કરી તેને રાજસ્થાન પોલીસને સોંપવાની તજવીજ હાથ ધરવામાં આવી છે.
વિગતો:
શોધાયેલ ગુનો: રાજસ્થાન રાજ્યના નયાપુરા પોલીસ સ્ટેશન ગુ.ર.નં. ૫૨૯/૨૦૦૯ ઇ.પી.કો. કલમ ૩૭૯ મુજબ.
પકડાયેલ આરોપી: પ્રહલાદ સ/ઓ ખીમજી ઇંદ્રેકર (બંગાળી) (ઉંમર વર્ષ ૬૫, હાલ રહે. ફ્લેટ કોલોની, પાણીની ટાંકી પાસે, છારાનગર, કુબેરનગર, અમદાવાદ શહેર).
ગુનાહિત ઇતિહાસ: અગાઉ મહેસાણા જિલ્લાના ખેરાલુ પોલીસ સ્ટેશનમાં લૂંટના તેમજ અમદાવાદ શહેરના સરદારનગર, શાહીબાગ અને સોલા હાઈકોર્ટ પોલીસ સ્ટેશનમાં ચોરીના ગુનાઓમાં પકડાયેલ હતો.
