અમદાવાદ:
અમદાવાદ શહેરમાં પોલીસ દ્વારા ઘરફોડ ચોરીના ગુનાઓ ડામવા અને અનડિટેક્ટેડ ગુનાઓ શોધી કાઢવા માટે હાથ ધરવામાં આવેલી ઝુંબેશ અંતર્ગત, એલ.સી.બી. ઝોન-5 ની ટીમને મોટી સફળતા મળી છે. પોલીસે ઓનલાઇન રેપિડો/ઉબેર રાઈડ બુક કરાવીને ચોરી કરતી એક સંગઠિત ગેંગને ઝડપી પાડી છે.
પોલીસની કાર્યવાહી અને આરોપીઓની ધરપકડ
પોલીસ કમિશનર, અમદાવાદ શહેર તથા ઉચ્ચ અધિકારીઓના માર્ગદર્શન હેઠળ, એલ.સી.બી. ઝોન-5 ના પી.એસ.આઈ. કે.કે. જાડેજા અને તેમની ટીમે બાતમીના આધારે નરોડા વિસ્તારમાં બનેલ ઘરફોડ ચોરીના ગુનાનો ભેદ ઉકેલી નાખ્યો છે. પોલીસે ફરાનખાન ઉર્ફે ટેણીમેણી નિશારખાન પઠાણ, ફરહાજ ઇલ્યાસ અંસારી, મોહંમદઉમેર મોહંમદ તેહસીન અંસારી અને એક કાયદાના સંઘર્ષમાં આવેલ બાળ કિશોર સહિત કુલ 4 આરોપીઓને ઝડપી લીધા છે.
શું હતી ગેંગની મોડસ ઓપરેન્ડી (MO)?
આ ટોળકી પોલીસ પકડમાં ન આવે તે માટે ખૂબ જ સાવચેતી રાખતી હતી. આરોપીઓ ચોરીના પ્લાન મુજબ ઘરફોડ ચોરી કરવા જવા માટે ઓનલાઇન રેપિડો કે ઉબેર રાઈડ બુક કરાવતા હતા. ત્યારબાદ, તેઓ બંધ મકાનોની રેકી કરીને ચોરીને અંજામ આપતા હતા.
મુદ્દામાલ અને ગુનાહિત ઇતિહાસ
આ કાર્યવાહી દરમિયાન પોલીસે આરોપીઓ પાસેથી રોકડા રૂ. 1,50,500 અને રૂ. 12,000 ની કિંમતના 2 મોબાઇલ ફોન મળી કુલ રૂ. 1,62,500 નો મુદ્દામાલ કબજે કર્યો છે. પકડાયેલા ગેંગ લીડર ફરાનખાન ઉર્ફે ટેણીમેણી વિરુદ્ધ અગાઉ પણ ગાયકવાડ હવેલી, નવરંગપુરા, ઓઢવ અને કાલુપુર સહિતના પોલીસ સ્ટેશનોમાં ઘરફોડ ચોરી, વાહન ચોરી અને સ્નેચિંગ જેવા ગંભીર ગુનાઓ નોંધાયેલા છે. તે બાળપણથી જ ગુનાહિત પ્રવૃત્તિઓમાં સંડોવાયેલો હોવાનું પોલીસ તપાસમાં બહાર આવ્યું છે.
આ સમગ્ર સફળ કામગીરીમાં એલ.સી.બી. ઝોન-5 ના સ્ટાફના સભ્યોએ મહત્વની ભૂમિકા ભજવી છે.
