અમદાવાદ શહેર ક્રાઇમ બ્રાન્ચ ખાતે રૂ. ૩.૭૨ કરોડથી વધુ રકમના સ્ટીલ પ્લેટના માલસામાનની કથિત છેતરપિંડી અને વિશ્વાસઘાત અંગેની એક ગંભીર ફરિયાદ નોંધાઈ છે. મુંબઈના બોરીવલી વેસ્ટ ખાતે રહેતા ૬૫ વર્ષીય વેપારી બિપિન મહિલાલ વ્યાસે અમદાવાદ ક્રાઇમ બ્રાન્ચમાં આ અંગે વિધિવત ફરિયાદ દાખલ કરાવી છે.
શું છે સમગ્ર મામલો?
ફરિયાદમાં જણાવ્યા અનુસાર, સપ્ટેમ્બર ૨૦૧૫ થી ૯ ફેબ્રુઆરી ૨૦૧૭ સુધીના સમયગાળા દરમિયાન આ ઠગાઈ આચરવામાં આવી હતી. અમદાવાદના નવરંગપુરા મીઠાખળી છ રસ્તા પાસે આવેલ સંપદા બિલ્ડિંગ ખાતેથી સમગ્ર વ્યવહાર થયો હતો.
આરોપી વરુણ વિજય ગુપ્તા (રહે. પ્લોટ નં. ૮૬, ૯૦, ૯૧, સરદાર પટેલ રિંગ રોડ, હાથીજણ સર્કલ પાસે, હાથીજણ, અમદાવાદ), જેઓ STEEL KONNECT (INDIA) PVT. LTD. ના માલિક છે, તેમણે પોતાના ઓળખીતા સાહેદ મુકેશભાઈ અરવિંદભાઈ પટેલની પેઢી ‘છપાયા ટ્રેડિંગ’ તથા રાજીવ ગોવિંદરામ અગ્રવાલની કંપની ‘કેર ક્રોપેક લિમિટેડ’ ના ‘સી’ ફોર્મ મોકલી આપ્યા હતા.
કરોડોનો માલ મેળવ્યા બાદ નાણાં ન ચૂકવ્યા
આ ‘સી’ ફોર્મના આધારે બિપિન વ્યાસ દ્વારા:
છપાયા ટ્રેડિંગ કંપનીને: રૂ. ૧,૬૯,૦૫,૫૧૫/- નો સ્ટીલ પ્લેટનો માલ
કેર ક્રોપેક લિમિટેડને: રૂ. ૨,૦૨,૯૫,૬૬૩/- નો સ્ટીલ પ્લેટનો માલ
આમ, કુલ રૂ. ૩,૭૨,૦૧,૧૭૮/- નો સ્ટીલ પ્લેટનો માલસામાન મોકલી આપવામાં આવ્યો હતો. જોકે, માલ મેળવી લીધા બાદ આજદિન સુધી આ રકમ ચૂકવવામાં આવી નહોતી અને વેપારી સાથે વિશ્વાસઘાત તથા છેતરપિંડી આચરવામાં આવી હતી.
પોલીસ તપાસ તેજ
મુંબઈના વેપારી બિપિન વ્યાસની ફરિયાદના આધારે અમદાવાદ ક્રાઇમ બ્રાન્ચે આરોપી વરુણ વિજય ગુપ્તા સામે ગુનો નોંધી આગળની કાયદેસરની કાર્યવાહી હાથ ધરી છે. આ સમગ્ર ગુનાની વધુ તપાસ ક્રાઇમ બ્રાન્ચના પોલીસ ઇન્સ્પેક્ટર સી. બી. ગામિત ચલાવી રહ્યા છે.
