અમદાવાદ: શહેર ક્રાઈમ બ્રાન્ચે એક એવો ભેદ ઉકેલ્યો છે જે છેલ્લા સાડા ત્રણ દાયકાથી જમીનમાં દટાયેલો હતો. વટવા વિસ્તારમાં ૩૫ વર્ષ પહેલા એક મહિલાની હત્યા કરી તેની લાશને ૧૮ ફૂટ ઊંડા ખાળકુવામાં દાટી દેવામાં આવી હતી, જેનો પર્દાફાશ ગઈકાલે કરવામાં આવ્યો છે.
બાતમીના આધારે કાર્યવાહી
ક્રાઈમ બ્રાન્ચને સચોટ બાતમી મળી હતી કે વટવાના કુતુબનગરના એક મકાનમાં વર્ષો પહેલા એક મહિલાની હત્યા કરી તેની લાશ દાટી દેવામાં આવી છે. આ માહિતીની તપાસ કરતા પોલીસને સાલીયાબીબીના જમાઈ સાદીકખાન પઠાણ મળી આવ્યા હતા, જેમની પૂછપરછમાં આ ઘટનાને સમર્થન મળ્યું હતું.
૧૮ ફૂટ ઊંડા ખાડામાંથી મળ્યું કંકાલ
ગઈકાલે તા. ૨૯/૦૪/૨૦૨૬ ના રોજ એક્ઝીક્યુટીવ મેજીસ્ટ્રેટ અને FSL અધિકારીઓની હાજરીમાં કુતુબનગર ખાતે આવેલા સાલીયાબીબીના જૂના મકાનમાં જે.સી.બી. વડે ખોદકામ કરવામાં આવ્યું હતું. આશરે ૧૮ ફૂટની ઊંડાઈએથી માનવ શરીરના હાડકાં (કંકાલ) મળી આવ્યા હતા. આ અવશેષોને ફોરેન્સિક પોસ્ટ મોર્ટમ અને ડી.એન.એ. તપાસ માટે મોકલી આપવામાં આવ્યા છે.
પારિવારિક વિવાદ અને હત્યાનું કાવતરું
પોલીસ તપાસમાં ખુલ્યું છે કે:
મૃતકનું નામ: ફરજાના (ઘોળકાની રહેવાસી).
લગ્ન જીવન: ફરજાનાના લગ્ન સુરત થયા હતા, પરંતુ મનમેળ ન હોવાથી તે પરત આવી હતી અને બાદમાં અમદાવાદમાં સમસુદ્દીન સાથે લગ્ન કર્યા હતા.
હત્યાનું કારણ: લગ્ન બાદ પણ બન્ને વચ્ચે અવારનવાર ઉગ્ર ઝઘડા થતા હતા. આથી કંટાળીને સમસુદ્દીને તેના મિત્ર અબ્દુલકરીમ છીપા, મોટાભાઈ ઈકબાલ અને સાલીયાબીબી સાથે મળીને ફરજાનાને પતાવી દેવાનો પ્લાન બનાવ્યો હતો.
ઘટના: આજથી ૩૫ વર્ષ પહેલા મોડી રાત્રે ચારેય જણાએ ભેગા મળી ફરજાનાનું ગળું દબાવી હત્યા કરી હતી અને લાશને ઘરના આંગણે બનાવેલા ખાળકુવામાં નાખી ઉપર સિમેન્ટનો સ્લેબ ભરી દીધો હતો.
વર્તમાન સ્થિતિ
આ ગુનામાં સામેલ સાલીયાબીબી અને કરીમભાઈ છીપાનું અવસાન થઈ ચૂક્યું છે. હાલમાં પોલીસ દ્વારા મૃતક ફરજાનાના સગાવ્હાલાના ડી.એન.એ. સેમ્પલ મેળવીને કંકાલ સાથે મેચ કરવાની પ્રક્રિયા હાથ ધરવામાં આવી છે. ક્રાઈમ બ્રાન્ચ આ મામલે વધુ તપાસ કરી રહી છે.
