જામનગર:
ગુજરાતમાં ગેરકાયદેસર દારૂ અને જુગારની પ્રવૃત્તિઓ સામે સ્ટેટ મોનીટરીંગ સેલ (SMC) દ્વારા કડક કાર્યવાહી હાથ ધરવામાં આવી છે. પોલીસ મહાનિદેશક અને મુખ્ય પોલીસ અધિકારી શ્રી જી.એસ. મલિક (IPS) ની સૂચના હેઠળ SMCના પોલીસ ઇન્સ્પેક્ટર આર.કે. કરમટાની ટીમે જામનગર જિલ્લાના પંચકોશી બી-ડિવિઝન પોલીસ સ્ટેશન વિસ્તાર હેઠળના નાઘેડી ગામની GIDCના ખુલ્લા રોડ પર વિદેશી દારૂના કટિંગ પર સફળ રેઇડ કરી હતી.
મોટી માત્રામાં દારૂ અને વાહનો જપ્ત
રેઇડ દરમિયાન SMCની ટીમે ભારતીય બનાવટના વિદેશી દારૂ/બીયરની આશરે 246 પેટીઓ (કુલ 10,409 બોટલ) જપ્ત કરી હતી, જેની કિંમત ₹37,21,848/- થાય છે. આ ઉપરાંત સ્થળ પરથી 5 વાહનો, 4 મોબાઇલ ફોન, રોકડ રકમ તથા અન્ય સાધન-સામગ્રી મળી કુલ ₹1,37,58,491/- નો મુદ્દામાલ કબ્જે કરવામાં આવ્યો છે.
2 આરોપીની અટકાયત, 9 વોન્ટેડ
પોલીસે સ્થળ પરથી 2 આરોપીઓની અટકાયત કરી છે, જ્યારે અન્ય 9 આરોપીઓને વોન્ટેડ જાહેર કરવામાં આવ્યા છે.
પકડાયેલ આરોપીઓ:
દિપક ઉર્ફે અટાપટુ જમનાદાસ જેઠવાણી (રહે. પંચવટી સોસાયટી, રણજીત સાગર રોડ, જામનગર)
યુવરાજસિંહ કાળુભા ચુડાસમા (રહે. નવાપરા, નાઘેડી ગામ, જામનગર)
વોન્ટેડ આરોપીઓ:
રામ ઉર્ફે રામકો જીવાભાઈ મોઢવાડીયા/મેર (રહે. નાઘેડી ગામ, જામનગર)
કાના જીવાભાઈ મોઢવાડીયા (રહે. નાઘેડી ગામ, જામનગર)
ઈરફાન કાસમ કાટેલીયા (રહે. નાઘેડી ગામ, જામનગર)
જિજ્ઞેશ ઉર્ફે જીગો વિનોદ ખિચડા (રહે. દિગ્વિજય પ્લોટ, જામનગર)
અસ્પાક (રહે. માલબ, જિલ્લા નુહ, હરિયાણા)
રાહુલ રઝાક (રહે. રૂપબાસ, ભરતપુર, રાજસ્થાન)
સ્થળ પર મળી આવેલ વાહનોના માલિકો સહિત અન્ય 3 આરોપીઓ
ગુનાહિત ઇતિહાસ ધરાવતા આરોપીઓ
પકડાયેલ અને વોન્ટેડ આરોપીઓ અગાઉ પણ અનેક ગુનાઓમાં સંકળાયેલા છે:
દિપક ઉર્ફે અટાપટુ: જામનગર, કચ્છ, મોરબી અને રાજકોટ ગ્રામ્ય વિસ્તારમાં દારૂની હેરાફેરીના આશરે 22 ગુના નોંધાયેલા છે.
યુવરાજસિંહ ચુડાસમા: જામનગર અને રાજકોટ શહેરમાં 3 ગુના નોંધાયેલા છે, જેમાં તેઓ રાજકોટ DCB પો.સ્ટે.ના ગુનામાં નાસતા-ફરતા હતા.
રામ ઉર્ફે રામકો: જામનગર, દેવભૂમિ દ્વારકા, પાટણ અને સુરેન્દ્રનગરમાં આશરે 49 ગુનાઓ ધરાવે છે.
કાના જીવાભાઈ: જામનગર અને દેવભૂમિ દ્વારકા જિલ્લામાં 5 ગુનાઓ નોંધાયેલા છે.
ઈરફાન કાટેલીયા: જામનગર અને દેવભૂમિ દ્વારકા જિલ્લામાં 8 ગુનાઓ નોંધાયેલા છે.
જિજ્ઞેશ ઉર્ફે જીગો: જામનગરમાં આશરે 15 ગુનાઓ ધરાવે છે.
આ મામલે પંચકોશી બી-ડિવિઝન પોલીસ સ્ટેશન ખાતે પ્રોહિબિશન એક્ટની વિવિધ કલમો તેમજ ભારતીય ન્યાય સંહિતા-2023 (BNS) ની કલમ 111(2)(બી) અને 111(3)(4) હેઠળ ગુનો દાખલ કરી આગળની તપાસ હાથ ધરવામાં આવી છે.
