અમદાવાદ: સરખેજ પોલીસે ગઈકાલે રાત્રિ દરમિયાન એક મોટા ઓપરેશનમાં નકલી દેશી-વિદેશી (ઈંગ્લીશ) દારૂ બનાવતી મીની ફેક્ટરીનો પર્દાફાશ કર્યો છે. સરખેજ પોલીસ સ્ટેશનનો ચાર્જ સંભાળ્યા બાદ પી.આઈ. એસ.એ. ગોહિલની આગેવાની હેઠળ, સર્વેલન્સ સ્ક્વોડના PSI સહિતની ટીમે આ સફળ કાર્યવાહી પાર પાડી હતી.
પોલીસને મળેલી બાતમી મુજબ, તારીખ ૩૧/૦૮/૨૦૨૫ ના રોજ રાત્રે ૨૩:૫૫ કલાકે આ ઓપરેશન શરૂ કરવામાં આવ્યું હતું. પોલીસનો આ દરોડો લગભગ ૩૫ મિનિટ સુધી ચાલ્યો હતો. અંતે, તારીખ ૦૧/૦૯/૨૦૨૫ ના રોજ રાત્રે ૦૦:૩૦ કલાકે, પોલીસે ફતેહવાડી કેનાલ પાસેની મોહંમદી સોસાયટી, મકાન નંબર ૫૮, (ફુઝેલ પાર્ક સોસાયટીની સામે) સ્થિત ફેક્ટરી પર ત્રાટકીને ગેરકાયદેસર પ્રવૃત્તિનો પર્દાફાશ કર્યો હતો.
પોલીસે ઘટનાસ્થળેથી નકલી દારૂ બનાવવા માટે ઉપયોગમાં લેવાતા કેમિકલ, દારૂની બોટલો, લેબલ અને અન્ય સામગ્રીનો મોટો જથ્થો કબજે કર્યો છે. જોકે, દરોડા દરમિયાન ફેક્ટરી ચલાવતો મુખ્ય આરોપી અખ્તર અલી યુસુફઅલી સૈયદ, જે ગોમતીપુરનો રહેવાસી છે, તે પોલીસના હાથે ઝડપાતા પહેલાં જ ફરાર થવામાં સફળ રહ્યો હતો.
હાલ, સરખેજ પોલીસે ફરાર આરોપી અખ્તર અલી સૈયદ અને આ ગુનામાં સંડોવાયેલા અન્ય તમામ આરોપીઓને પકડવા માટે સઘન શોધખોળ હાથ ધરી છે. આ કાર્યવાહી સ્થાનિક સ્તરે નકલી દારૂના કાળા કારોબારને મોટો ફટકો પડ્યો છે.
