અમદાવાદ: શહેરમાં વિશ્વાસઘાત અને છેતરપિંડીના બનાવો અટકાવવા માટે પોલીસ કમિશનર દ્વારા અપાયેલી સૂચનાના પગલે ખોખરા પોલીસને મોટી સફળતા મળી છે. ફરિયાદી પાસેથી વિશ્વાસમાં લઈ સ્કોર્પિયો ગાડી પડાવી લેનાર રીઢા ગુનેગારને ખોખરા પોલીસ સ્ટેશનના સર્વેલન્સ સ્ક્વોડે મુદ્દામાલ સાથે દબોચી લીધો છે.
શું હતો સમગ્ર મામલો?
ખોખરા પોલીસ સ્ટેશનમાં નોંધાયેલ ગુના (પાર્ટ-એ ગુ.ર.નં. ૧૧૧૯૧૦૦૩૨૬૦૨૨૬/૨૦૨૬) મુજબ, આરોપી અમિત યોગેશભાઈ ભોગીલાલ ભાવસાર (રહે. હંસપુરા, નરોડા) એ ફરિયાદી સાથે મિત્રતા કેળવી, તેમનો વિશ્વાસ જીતી લીધો હતો. ત્યારબાદ, ફરિયાદી પાસેથી સ્કોર્પિયો ફોર-વ્હીલર ગાડી લઈ પરત ન આપી છેતરપિંડી આચરી હતી.
પોલીસ કાર્યવાહી અને ધરપકડ
પોલીસ ઇન્સ્પેક્ટર બી.પી. સાવલીયા અને પી.એસ.આઈ. એસ.એ. ઝાલાના માર્ગદર્શન હેઠળ સર્વેલન્સ ટીમે બાતમીના આધારે તપાસ હાથ ધરી હતી. તપાસ દરમિયાન જાણવા મળ્યું હતું કે આરોપીએ માત્ર સ્કોર્પિયો જ નહીં, પરંતુ અન્ય એક બલેનો ડેલ્ટા ગાડી પણ આ જ રીતે છેતરપિંડીથી મેળવી હતી. પોલીસે આરોપીને બંને ગાડીઓ સાથે ઝડપી પાડ્યો હતો.
રિકવર કરેલ મુદ્દામાલ:
મહિન્દ્રા એન્ડ મહિન્દ્રા સ્કોર્પિયો: કિંમત ₹૧૮,૦૦,૦૦૦/-
મારુતિ સુઝુકી બલેનો ડેલ્ટા: કિંમત ₹૫,૦૦,૦૦૦/-
કુલ મુદ્દામાલ: ₹૨૩,૦૦,૦૦૦/-
આરોપીનો ગુનાહિત ઇતિહાસ
ઝડપાયેલ આરોપી અમિત ભાવસાર અગાઉ પણ ગુનાહિત પ્રવૃત્તિઓમાં સંડોવાયેલો હોવાનું સામે આવ્યું છે. તેની સામે અગાઉ નિકોલ પોલીસ સ્ટેશનમાં પણ ભારતીય ન્યાય સંહિતાની કલમ ૩૧૬(૨), ૩૧૮(૪) મુજબ છેતરપિંડીનો ગુનો નોંધાયેલો છે.
હાલમાં પોલીસે ભારતીય ન્યાય સંહિતા ૨૦૨૩ ની કલમ ૩૧૬(૨) અને ૩૧૮(૪) મુજબ ગુનો નોંધી વધુ તપાસ હાથ ધરી છે. આ કામગીરી દ્વારા ખોખરા પોલીસે મિલકત સંબંધી ગુનાઓ આચરતા તત્વો સામે કડક સંદેશ આપ્યો છે.
