અમદાવાદ: અમદાવાદ ગ્રામ્ય જિલ્લામાં નશીલા પદાર્થોની હેરાફેરી અને વેચાણના નેટવર્કને તોડી પાડવા માટે પોલીસ દ્વારા આક્રમક અભિયાન ચલાવવામાં આવી રહ્યું છે. જે અંતર્ગત સ્પેશિયલ ઓપરેશન ગ્રુપ (SOG) એ બાતમીના આધારે ઓપરેશન પાર પાડી શીલજ વિસ્તારમાંથી બે શખ્સોને લાખોની કિંમતના પ્રતિબંધિત હાઇબ્રીડ ગાંજા સાથે ઝડપી પાડ્યા છે.
ગુપ્ત બાતમીના આધારે વોચ ગોઠવી
અમદાવાદ રેન્જ આઈ.જી. શ્રી રાઘવેન્દ્ર વત્સ અને જિલ્લા પોલીસ અધિક્ષક શ્રી ઓમ પ્રકાશ જાટની સૂચના હેઠળ SOG પી.આઈ. શ્રી એસ.એન. રામાણીના માર્ગદર્શનમાં સ્ટાફ પેટ્રોલીંગમાં હતો. આ દરમિયાન એ.એસ.આઈ. મનુભાઇ અને કોન્સ્ટેબલ હાર્દિકભાઈ તથા હર્ષદભાઈને ચોક્કસ બાતમી મળી હતી કે, બે શખ્સો જ્યુપિટર સ્કૂટર પર હાઇબ્રીડ ગાંજાનો જથ્થો લઈને શીલજ સર્કલથી ગામ તરફ વેચાણ કરવા નીકળવાના છે.
FSL તપાસમાં નશો હોવાની પુષ્ટિ
બાતમીવાળા સ્થળે વોચ ગોઠવતા બે શખ્સો શંકાસ્પદ હાલતમાં મળી આવ્યા હતા. તેમની તલાશી લેતા તેમની પાસેથી કાળા-ભૂખરા રંગનો ૨૪૫ ગ્રામ હાઇબ્રીડ ગાંજો મળી આવ્યો હતો. સ્થળ પર હાજર FSL અધિકારી જે.એસ. નિર્મલ દ્વારા ચકાસણી કરવામાં આવતા આ જથ્થો NDPS એક્ટ હેઠળ પ્રતિબંધિત હોવાનું સાબિત થયું હતું. આ જથ્થાની બજાર કિંમત આશરે ₹૮,૫૭,૫૦૦/- આંકવામાં આવી છે.
ઝડપાયેલા આરોપીઓ અને મુદ્દામાલ
પોલીસે આ મામલે નીચે મુજબના બે શખ્સોની ધરપકડ કરી છે:
યશ કનૈયાલાલ ચૌહાણ (ઉ.વ. ૨૭): રહે. તુલશી શ્યામ ફ્લેટ, નવા વાડજ, અમદાવાદ.
નીરજ પ્રવિણભાઇ પટેલ (ઉ.વ. ૪૨): રહે. ધ સ્પયર ફ્લેટ, ભાડજ સર્કલ પાસે, અમદાવાદ.
કુલ ₹૯,૦૮,૩૬૦/- નો મુદ્દામાલ જપ્ત:
હાઇબ્રીડ ગાંજો (245 ગ્રામ): ₹8,57,500/-
જુપીટર સ્કૂટર (GJ-01-XJ-9222): ₹20,000/-
મોબાઇલ ફોન (નંગ-2): ₹20,000/-
રોકડ રકમ: ₹10,760/-
અન્ય સાધન સામગ્રી.
પોલીસ કાર્યવાહી
આરોપીઓ વિરુદ્ધ બોપલ પોલીસ સ્ટેશનમાં NDPS એક્ટની કલમ ૮(સી), ૨૦(બી)૨(એ), ૨૯ મુજબ ગુનો નોંધી વધુ તપાસ હાથ ધરવામાં આવી છે. આ સફળ કામગીરીમાં SOG પી.આઈ. એસ.એન. રામાણી, પી.એસ.આઈ. આઈ.કે. શેખ અને તેમની ટીમ જોડાઈ હતી.
