નરોડા પોલીસનો માસ્ટરસ્ટ્રોક: મિશ્ર એસ્ટેટમાં ચોરી કરનાર બે રીઢા તસ્કરો રૂ. ૯.૫૯ લાખના મુદ્દામાલ સાથે ઝડપાયા
અમદાવાદ: શહેરના નરોડા વિસ્તારમાં આવેલી GIDCમાં ઘરફોડ ચોરીના ગુનાનો ભેદ ઉકેલવામાં નરોડા પોલીસને મોટી સફળતા મળી છે. પોલીસે ગણતરીના દિવસોમાં જ બે રીઢા ગુનેગારોને સફેદ રંગની વરના કાર અને લાખોની રોકડ રકમ સહિત કુલ રૂ. ૯,૫૯,૫૦૦/- ના મુદ્દામાલ સાથે દબોચી લીધા છે.
ગુનાની વિગત અને પોલીસ કાર્યવાહી
નરોડા GIDCમાં મુઠીયા ટોલટેક્ષ પાસે આવેલા ‘મિશ્ર એસ્ટેટ’ ના તાળા તોડી રોકડ રકમની ચોરી થઈ હોવાની ફરિયાદ નોંધાઈ હતી. આ ગુનાની ગંભીરતા જોઈને પોલીસ કમિશનર અને ઉચ્ચ અધિકારીઓની સૂચના હેઠળ નરોડા પોલીસ ઇન્સ્પેક્ટર પી.વી. ગોહીલના માર્ગદર્શનમાં એક ટીમ બનાવવામાં આવી હતી.
પોલીસ કોન્સ્ટેબલ સુરેન્દ્રસિંહ, વિક્રમકુમાર અને પિયુષકુમારને ચોક્કસ બાતમી મળી હતી કે, ચોરીમાં સંડોવાયેલા બે ઇસમો સફેદ વરના કારમાં નાના ચીલોડાથી મુઠીયા ગામ તરફ જઈ રહ્યા છે. બાતમીના આધારે વોચ ગોઠવી પોલીસે કારને અટકાવી તપાસ કરતા આરોપીઓ પાસેથી મોટી માત્રામાં રોકડ મળી આવી હતી.
ઝડપાયેલા આરોપીઓ:
દિવ્યાંગ ઉર્ફે દિવ્યેશ બળવંતભાઈ રાઠોડ (ઉં. ૩૪): રહે. નરોડા (મૂળ રહે. મનકોલ).
હિતેન્દ્ર ઉર્ફે ટશન છોટુભાઈ સીંગોલીયા (ઉં. ૩૫): રહે. શાહીબાગ, અમદાવાદ.
કબ્જે કરેલો મુદ્દામાલ:
પોલીસે આરોપીઓ પાસેથી નીચે મુજબનો મુદ્દામાલ જપ્ત કર્યો છે:
રોકડ રકમ: રૂ. ૧,૪૯,૦૦૦/-
મોબાઈલ ફોન: ૩ નંગ (કિંમત રૂ. ૧૦,૫૦૦/-)
કાર: હ્યુન્ડાઈ વરના (નંબર GJ-11-DB-0612, કિંમત રૂ. ૮,૦૦,૦૦૦/-)
કુલ કિંમત: રૂ. ૯,૫૯,૫૦૦/-
આરોપીઓનો ગુનાહિત ઇતિહાસ
પોલીસ તપાસમાં બહાર આવ્યું છે કે પકડાયેલા બંને આરોપીઓ રીઢા ગુનેગારો છે. મુખ્ય આરોપી દિવ્યાંગ રાઠોડ વિરુદ્ધ અગાઉ ૩૫ જેટલા ગુનાઓ નોંધાઈ ચૂક્યા છે, જેમાં ચોરી, ઘરફોડ અને પ્રોહિબિશનના ગુનાઓનો સમાવેશ થાય છે. જ્યારે હિતેન્દ્ર વિરુદ્ધ પણ ૯ જેટલા ગુનાઓ નોંધાયેલા છે.
આ પ્રશંસનીય કામગીરીમાં પો.સ.ઇ. વી.આર. ચૌધરી અને તેમની ટીમ (ભરતભાઈ, મહેશભાઈ, પ્રદીપસિંહ, હરપાલસિંહ સહિતના સ્ટાફ) એ મહત્વની ભૂમિકા ભજવી હતી. હાલ પોલીસે બંને આરોપીઓની ધરપકડ કરી આગળની કાયદેસરની કાર્યવાહી હાથ ધરી છે.
