મહીસાગર / દાહોદ:
મહીસાગર જિલ્લાના કોઠંબા પોલીસ સ્ટેશન હેઠળ આવતી વરધરી આઉટ પોસ્ટ ખાતે ફરજ બજાવતા બિન-હથિયારી પોલીસ સબ ઇન્સ્પેક્ટર (વર્ગ-૩) કેસરસિંહ રતુજી ચાવડા રૂ. ૧,૦૦,૦૦૦/- ની લાંચ લેતા એન્ટી કરપ્શન બ્યુરો (ACB) ના હાથે રંગેહાથ ઝડપાઇ ગયા છે.
ઘટનાની વિગત:
આ કામના ફરીયાદીશ્રીની ગાડીના ડ્રાઇવર ધ્વારા અગાઉ એક ફેટલ અકસ્માત સર્જાયો હતો. આ અકસ્માતના કેસમાં આરોપી ડ્રાઇવરને પોલીસ સ્ટેશનમાંથી જામીન આપવા તેમજ પોલીસ દ્વારા માર નહીં મારવા અને કાનૂની કાર્યવાહીમાં રાહત આપવાના બદલામાં PSI કેસરસિંહ ચાવડાએ રૂ. ૨,૦૦,૦૦૦/- ની લાંચની માંગણી કરી હતી.
ફરીયાદીશ્રી લાંચની આ રકમ આપવા માંગતા ન હોવાથી, તેમણે જાગૃત નાગરીક તરીકે દાહોદ એ.સી.બી. પોલીસ સ્ટેશનનો સંપર્ક કરી સમગ્ર બાબતે વિગતવાર ફરીયાદ નોંધાવી હતી.
ACBનું સફળ છટકું:
ફરીયાદીની રજૂઆતના આધારે દાહોદ એ.સી.બી.ના પોલીસ ઇન્સ્પેક્ટર શ્રી એસ.એમ.પઠાણ તથા તેમની ટીમે તા. ૦૫/૦૯/૨૦૨૬ ના રોજ વરધરી આઉટ પોસ્ટ ખાતે લાંચનું છટકું ગોઠવ્યું હતું. આ ટ્રેપ દરમિયાન આરોપી PSI કેસરસિંહ ચાવડાએ ફરીયાદી પાસેથી લાંચના હપ્તા પેટે રૂ. ૧,૦૦,૦૦૦/- ની રકમ સ્વીકારતા જ ACBની ટીમે તેમને સ્થળ પર જ પકડી પાડ્યા હતા. ACB ટીમે સ્વીકારેલી રૂ. ૧,૦૦,૦૦૦/- ની સમગ્ર રકમ રીકવર કરી આરોપી સામે ગુનો નોંધી આગળની કાયદેસરની ધારાધોરણ મુજબની કાર્યવાહી હાથ ધરી છે.
મુખ્ય માહિતી ટૂંકમાં:
આરોપી: કેસરસિંહ રતુજી ચાવડા (બિન હથિયારી PSI, વર્ગ-૩, કોઠંબા પો.સ્ટે., વરધરી આઉટ પોસ્ટ, જી. મહીસાગર)
મૂળ નિવાસી: દરબાર ફળીયું, નાનુ રાજ પડુસ્મા ગામ, તા. માણસા, જી. ગાંધીનગર
ગુનાનું સ્થળ: વરધરી આઉટ પોસ્ટ
ટ્રેપ તારીખ: ૦૫/૦૯/૨૦૨૬
માગેલી લાંચ: રૂ. ૨,૦૦,૦૦૦/-
સ્વીકારેલ/રીકવર રકમ: રૂ. ૧,૦૦,૦૦૦/-
ટ્રેપીંગ અધિકારી: શ્રી એસ.એમ.પઠાણ (પોલીસ ઇન્સ્પેક્ટર, ACB પો.સ્ટે. દાહોદ) અને સ્ટાફ
(નોંધ: નાગરિકોને ભ્રષ્ટાચાર સામે લડવા માટે ACB ના ટોલ-ફ્રી નંબર ૧૦૬૪ પર સંપર્ક કરવા અપીલ કરવામાં આવે છે.)
