અમદાવાદ: ઓનલાઈન પ્લેટફોર્મ પરથી મોંઘા મોબાઈલ અને ગેજેટ્સ ઓર્ડર કરી, ડિલિવરી દરમિયાન તેને ડમી પ્રોડક્ટ સાથે બદલી નાખતી શાતિર ગેંગને અમદાવાદ ક્રાઈમ બ્રાન્ચે ઝડપી પાડી છે. આ ગેંગ ગુજરાત અને રાજસ્થાનના વિવિધ શહેરોમાં સક્રિય હતી.
મોડસ ઓપરેન્ડી: કેવી રીતે આચરતા છેતરપિંડી?
આ ગેંગના મુખ્ય સૂત્રધારોએ સુનિયોજિત રીતે આ કૌભાંડનું નેટવર્ક ગોઠવ્યું હતું:
ડિલિવરી બોય તરીકે ઘૂસણખોરી: આરોપીઓએ પોતાના મળતિયાઓને અમદાવાદ, વડોદરા, સુરત અને રાજસ્થાનના જાલોરમાં કુરિયર કંપનીઓમાં ડિલિવરી બોય તરીકે નોકરી પર રખાવ્યા હતા.
ફેક આઈડીથી ઓર્ડર: ગેંગના અન્ય સભ્યો અલગ-અલગ આઈડી અને પાસવર્ડનો ઉપયોગ કરીને આઈફોન જેવા મોંઘા ગેજેટ્સના ઓર્ડર આપતા હતા.
સીલ તોડ્યા વગર અસલ પ્રોડક્ટની ચોરી: જ્યારે પાર્સલ ડિલિવરી માટે મળતિયા ડિલિવરી બોય પાસે આવતું, ત્યારે તેઓ ખાસ સાધનો (ગ્લુ રિમૂવર અને ઇન્જેક્શન) ની મદદથી પાર્સલ એવી રીતે ખોલતા કે સીલ અકબંધ લાગે. અસલ પ્રોડક્ટ કાઢી તેની જગ્યાએ ડમી પ્રોડક્ટ મૂકી દેતા.
ઓર્ડર કેન્સલેશન: ત્યારબાદ ગ્રાહક દ્વારા ઓર્ડર કેન્સલ કરાવી દેવામાં આવતો, જેથી ડમી પ્રોડક્ટ કંપનીમાં પરત જતી અને અસલ મોંઘી પ્રોડક્ટ આ ગેંગ પાસે રહી જતી.
ઝડપાયેલા આરોપીઓ
પોલીસે નીચે મુજબના 5 શખ્સોની ધરપકડ કરી છે:
રામલાલ ઉર્ફે રોમિલ ગેહલોત (રહે. જાલોર, રાજસ્થાન)
મનોજ કુમાર માલી (રહે. જાલોર, રાજસ્થાન)
ભરત કુમાર સુંદેશા (રહે. જાલોર, રાજસ્થાન)
વિશાલ હસમુખભાઈ પંચાલ (રહે. સુરત)
વિશાલ કાનજીભાઈ બાવરી (રહે. અમદાવાદ/રાજસ્થાન)
(નોંધ: રિષિપાલ ભાટી અને વિનોદ નામના બે આરોપીઓ હાલ વોન્ટેડ છે.)
જપ્ત કરાયેલ મુદ્દામાલ
ક્રાઈમ બ્રાન્ચે આરોપીઓ પાસેથી છેતરપિંડીમાં વપરાતી ‘સ્કેમ કિટ’ અને અન્ય સામાન જપ્ત કર્યો છે:
અસલ પ્રોડક્ટ્સ: 8 મોબાઈલ ફોન, કેમેરા લેન્સ.
ડમી આઈટમ્સ: 25 ડમી મોબાઈલ, 3 ડમી ઇયર બડ્સ, 12 ગેમીંગ પ્રોસેસર.
સાધનો: ગ્લુ રિમૂવર બોટલ, પ્લાસ્ટિકના ઇન્જેક્શન, પાર્સલ ખોલવાના સ્ટીલના સાધનો, સેલોટેપ અને પાર્સલ રોલ.
વાહન: ગુનામાં વપરાતી સ્કોર્પિયો કાર.
અન્ય ગુનાઓની કબૂલાત
પૂછપરછ દરમિયાન આરોપીઓએ સ્વીકાર્યું છે કે તેઓએ:
જાન્યુઆરી 2026: વડોદરામાં iPhone 17 Pro Max અને 16 Pro (03 નંગ) ની છેતરપિંડી કરી હતી.
ડિસેમ્બર 2025: જાલોર (રાજસ્થાન) ખાતે બે એપલ વોચની છેતરપિંડી કરી હતી.
ઓક્ટોબર 2025: સુરત ખાતે 7 મોબાઈલ ફોન અને 10 એપલ વોચની છેતરપિંડી કરી હતી.
પોલીસે આ મામલે ભારતીય ન્યાય સંહિતા (BNS) ની કલમ 61(2)એ અને 316(5) હેઠળ ગુનો નોંધી વધુ તપાસ હાથ ધરી છે.
